پاکستان میں ترک سفارتخانے کے کونسلر برائے مذہبی امور، عالم خان نے وزارت مذہبی امور میں مرکزی رؤیت ہلال کمیٹی کے چیئرمین، عبدالخبیر آزاد اور دیگر ذمہ داران سے ملاقات کی۔ ملاقات میں چاند کی رؤیت کے طریقہ کار اور اس سے متعلق امور پر تفصیلی تبادلہ خیال کیا گیا۔
کونسلر نے رؤیتِ ہلال کمیٹی کے اجلاس میں شرکت کی اور چاند دیکھنے کے عملی مشاہدے میں حصہ لیا، تاکہ مقامی طریقہ کار اور اس کی تفصیلات کا قریب سے جائزہ لیا جا سکے۔ اس موقع پر انہوں نے ترکیہ میں مذہبی امور اور رؤیتِ ہلال کمیٹی کے نظام سے پاکستانی حکام کو آگاہ کیا، جس میں چاند کی رؤیت کے سائنسی اور شرعی اصول، مشاہداتی طریقہ کار اور فیصلہ سازی کے مراحل شامل تھے۔
ملاقات میں دونوں ممالک کے رؤیتِ ہلال کے طریقہ کار کا تقابلی جائزہ لیا گیا اور مستقبل میں اس حوالے سے باہمی تعاون کے فروغ، تجربات اور معلومات کے تبادلے پر بھی اتفاق کیا گیا۔ اس بات کا عزم کیا گیا کہ، دونوں ممالک کے مذہبی ادارے آئندہ بھی ایک دوسرے کے ساتھ قریبی روابط رکھیں گے ، تاکہ اس اہم دینی معاملے میں ہم آہنگی اور بہتری لائی جا سکے۔
