دارالحکومت انقرہ میں باک ترک کلچرل ایسوسی ایشن کے صدر برہان قایا ترک کی جانب سے ہر سال کی طرح اس سال بھی پاکستانی کمیونٹی کے اعزاز میں افطار ڈنر کا اہتمام کیا گیا۔
افطار ڈنر میں ترکیہ میں پاکستانی سفیر ڈاکٹر یوسف جنید ، پاکستانی سفارتکاروں ، سفارتخانہ پاکستان کے اسٹاف اور انقرہ میں مقیم پاکستانی طلبا و طالبات کے علاوہ پاکستانی کمیونٹی کے افراد نے بڑی تعداد میں شرکت کی۔
ایسوسی ایشن کے صدر برہان قایا ترک ہر سال بڑی باقاعدگی سے اس کا اہتمام اپنے شاپنگ مال میں کرتے ہیں۔
افطار ڈنر کے موقع پر برہان قایا ترک نے ایک بار پھر جسٹس اینڈ ڈولپمینٹ پارٹی کے ٹکٹ پر پہلے نمبر پر الیکشن لڑنے کی خوش خبری بھی سنائی ۔
یاد رہے کہ برہان قایا ترک اس سے قبل ایک بار انقرہ سے اور دو بار وان سے رکنِ پارلیمنٹ منتخب ہوچکے ہیں جبکہ گزشتہ انتخابات میں انہوں نے انتخابات میں حصہ نہیں لیا تھا۔
اس موقع پر سفیر پاکستان اور پاکستان کے سفارتکاروں نے بھی برہان قایا ترک کو الیکشن لڑنے اور ان انتخابات میں کامیابی حاصل کرنے کے لیے نیک تمناوں کا اظہار کیا۔
