[شہر] — پاکستان کے سفارتخانے نے پاکستان ایمبیسی انٹرنیشنل اسٹڈی گروپ کے تعاون سے حضرت محمد ﷺ کی 1500 ویں ولادتِ باسعادت کی تقریبات کے حصے کے طور پر ایک بین الاقوامی سیرت النبی ﷺ کانفرنس کا انعقاد کیا۔
تقریب میں معزز مہمانانِ گرامی نے شرکت کی جن میں بنگلہ دیش کے سفیر ایم امان الحق، مالدیپ کے سفیر عبد الرحیم، سوڈان کے سفیر نادر یوسف الطیب، ترکیہ کے سابق قونصل جنرل جمال سانگو اور برادرانہ ممالک متحدہ عرب امارات، ایران، آذربائیجان اور مصر کے سفارتکار شامل تھے۔
ممتاز اسکالرز پروفیسر ڈاکٹر مرزاہان حیزال، ڈاکٹر شبان علی دوزگن اور پاکستان کے سفیر ڈاکٹر یوسف جُنید نے پرمغز خطابات کیے۔
مقررین نے اس بات پر زور دیا کہ نبی کریم ﷺ کا پیغامِ رحمت، اخوت، عدل اور ہمدردی پوری انسانیت کے لیے رہنمائی کا سرچشمہ ہے۔
پراثر نعتیہ کلام نے تقریب کو روحانیت اور وقار بخشا۔
سفیر ڈاکٹر یوسف جُنید کے خیالات
اپنے خطاب میں سفیر ڈاکٹر یوسف جُنید نے سیرت النبی ﷺ کی موجودہ دور میں اہمیت کو اجاگر کرتے ہوئے کہا:
"نبی کریم ﷺ کی سیرت زندہ رہنمائی ہے۔ یہ ہمیں محدود مفادات سے بلند ہوکر انسانیت کی اجتماعی بھلائی کے لیے کام کرنے کا چیلنج دیتی ہے۔ یہ دنیا میں امن پھیلانے، سختیوں کے دور میں رحمت دکھانے اور ناانصافی کے دور میں عدل قائم کرنے کی تعلیم دیتی ہے۔”
کانفرنس کا اختتام اس عہد کے ساتھ ہوا کہ آج کی دنیا کو درپیش اخلاقی اور سماجی چیلنجز سے نمٹنے کے لیے نبی کریم ﷺ کی سیرتِ طیبہ سے رہنمائی لینا ہی واحد راستہ ہے۔
