امریکی صدر نے ذرائع ابلاغ سے گفتگو کرتے ہوئے کہا کہ ایران کے آئندہ سپریم لیڈر کو واشنگٹن کی منظوری درکار ہوگی، بصورتِ دیگر وہ زیادہ دیر تک اقتدار برقرار نہیں رکھ پائے گا۔ ان کا کہنا تھا کہ وہ نہیں چاہتے کہ آئندہ چند برسوں میں امریکہ کو ایران کے ساتھ دوبارہ کسی بڑے تصادم کا سامنا کرنا پڑے۔
ٹرمپ نے مزید کہا کہ امریکہ نہیں چاہتا کہ چند سال بعد دوبارہ اسی طرح کی صورتحال پیدا ہو یا ایران جوہری ہتھیار حاصل کر لے۔
ادھر ایرانی حکام نے امریکی صدر کے بیان کو مسترد کر دیا ہے۔ ایران کے وزیرِ خارجہ عباس عراقچی نے کہا کہ ملک کے اگلے رہنما کا انتخاب صرف ایرانی عوام کا داخلی معاملہ ہے اور اس میں کسی بیرونی مداخلت کو قبول نہیں کیا جائے گا۔
دوسری جانب ایران کے سینئر مذہبی رہنما احمد علمالہدا نے کہا کہ ماہرین کی مجلس نے علی خامنہای کے جانشین کے بارے میں ووٹنگ کر لی ہے، تاہم اس نام کو تاحال ظاہر نہیں کیا گیا۔
امریکی صدر اس سے قبل بھی یہ کہہ چکے ہیں کہ وہ ایران کے اگلے رہنما کے انتخاب کے معاملے میں ذاتی طور پر کردار ادا کرنے کی توقع رکھتے ہیں۔ انہوں نے مبینہ طور پر مضبوط امیدوار سمجھے جانے والے مجتبی خامنہای کو کمزور شخصیت قرار دیا تھا۔
خطے میں کشیدگی اس وقت مزید بڑھ گئی جب گزشتہ ہفتے امریکہ اور اسرائیل نے ایران پر مشترکہ حملہ کیا، جو اتوار کو نویں روز میں داخل ہو گیا۔ اطلاعات کے مطابق ان حملوں میں بارہ سو سے زائد افراد ہلاک ہو چکے ہیں۔
اس کے جواب میں ایران نے ڈرون اور میزائل حملوں کے ذریعے اسرائیل اور خلیجی ممالک میں موجود امریکی فوجی تنصیبات کو نشانہ بنایا ہے۔
