اقوام متحدہ کے سیکریٹری جنرل انتونیو گوتریس رمضان یکجہتی کے لیے انقرہ کا دورہ کریں گے جہاں انہیں عالمی امن کے لیے خدمات کے اعتراف میں اتاترک انٹرنیشنل پیس پرائز سے نوازا جائے گا۔
اقوام متحدہ کے ترجمان اسٹیفن دوجارک کے مطابق یہ دورہ رمضان کے دوران اقوام متحدہ کے سربراہ کی سالانہ روایت کا حصہ ہے جس کا مقصد مسلم دنیا کے ساتھ یکجہتی کا اظہار اور مہاجرین کی میزبانی کرنے والے ممالک کی خدمات کو سراہنا ہے۔
ترجمان نے بتایا کہ ترکیہ طویل عرصے سے جنگ اور تشدد سے بے گھر ہونے والے لاکھوں افراد کو پناہ فراہم کر رہا ہے۔ اس وقت ترکیہ میں تقریباً پچیس لاکھ مہاجرین اور پناہ کے متلاشی افراد مقیم ہیں جن میں بڑی تعداد شامی شہریوں کی ہے۔ گوتریس اپنے دورے کے دوران مہاجرین کی فلاح و بہبود کے لیے کام کرنے والی غیر سرکاری تنظیموں کے نمائندوں سے بھی ملاقات کریں گے۔
دورے میں خطے کی صورتحال، مہاجرین کے مسائل اور عالمی انسانی امداد کے معاملات پر تبادلہ خیال کیا جائے گا۔
