ترک صدر رجب طیب ایردوان سعودی عرب کے دو روزہ دورے پر گزشتہ روز جدہ پہنچے۔ دورے کا مقصد دونوں ممالک کے درمیان تعلقات کے ایک نئے دور کا آغاز کرنا ہے۔
صدر ایردوان نے کہا کہ ہم خادم الحرمین الشریفین کی دعوت پر سعودی عرب کا دورہ کر رہےہیں۔ ٹوئٹر پیغام میں انہوں نےکہا کہ ہم دونوں ممالک کے درمیان سیاسی، عسکری اور اقتصادی تعلقات کو بڑھانے کیلئے کوشاں ہیں۔
ایردوان نےکہا کہ سعودی عرب کے ساتھ صحت، توانائی ، خوراک، زرعی ٹیکنالوجی، دفاعی صنعت اور ماحولیات کے شعبوں میں تعاون دونوں ممالک کے مفاد میں ہے۔ بالخصوص توانائی کی ٹیکنالوجی میں تعاون کی صلاحیت موجود ہے۔
ایردوان نے کہا کہ ترکی خلیجی خطے کی سلامتی اور استحکام کو بہت اہمیت دیتا ہے۔ہم ہر قسم کی دہشتگردی کے خلاف ہیں اور خلیجی ممالک کے ساتھ انسداد دہشتگردی میں تعاون کو بہت اہمیت دیتے ہیں۔
انہوں نے امید ظاہر کی کہ دونوں ممالک اپنے تعلقات کو اس سطح پر لے جائیں گے جو پہلے تھے۔
صدر ایردوان کو جدہ پہنچنے پر سعودی عرب کے فرمانروا شاہ سلمان نے انکے اعزاز میں استقبالیہ تقریب کا انعقاد کیا اسکے بعد دونوں رہنماوں کے درمیان بند کمرے میں ملاقات ہوئی۔ایردوان نے سعودی ولی عہد شہزادہ محمد بن سلمان سے بھی ملاقات کی۔
