پریشتینا — ترکیہ کی دفاعی صنعت کی ایک اور بڑی کامیابی، کوسوو نے ترکی ساختہ بیرکتار ٹی بی-2 ڈرونز حاصل کر لیے ہیں تاکہ وہ اپنی فضائی نگرانی اور دفاعی صلاحیتوں کو مضبوط بنا سکے۔
کوسوو نے یہ ڈرونز سربیا کی ممکنہ جارحیت اور علاقائی سکیورٹی خطرات سے نمٹنے کے لیے آرڈر کیے تھے۔ اب ان ڈرونز کی فراہمی مکمل ہو چکی ہے، جس کے بعد کوسوو نے انہیں اپنی مسلح افواج کے بیڑے میں شامل کر لیا ہے۔
کوسوو کے صدر ویوسا عثمانی نے اس موقع پر کہا کہ:
“بیرکتار ٹی بی-2 ڈرونز ہماری خودمختاری اور سلامتی کے تحفظ میں اہم کردار ادا کریں گے۔ ہم ترکیہ کے شکر گزار ہیں جس نے دفاعی شعبے میں ہمارے شراکت دار کے طور پر ساتھ دیا۔”
ترکیہ کے تیار کردہ بیرکتار ٹی بی-2 ڈرونز اپنی کارکردگی، درستگی، اور کم لاگت کے باعث دنیا بھر میں مقبول ہیں۔ یہ ڈرونز پہلے ہی آذربائیجان، یوکرین، پاکستان، لیبیا، قطر، اور پولینڈ سمیت متعدد ممالک کو برآمد کیے جا چکے ہیں۔
ترکیہ کے دفاعی ماہرین کے مطابق، یہ پیش رفت ترکیہ کی عالمی دفاعی صنعت میں بڑھتی ہوئی اعتماد اور تکنیکی برتری کو ظاہر کرتی ہے۔
ترکیہ کے صدر رجب طیب ایردوان نے ماضی میں کہا تھا:
“ہماری دفاعی صنعت اب صرف ترکیہ کے لیے نہیں بلکہ دنیا بھر کے امن کے لیے طاقت بن چکی ہے۔”
