اسلامی جمہوریہ پاکستان کی وزارتِ خارجہ کی جانب سے جاری کردہ تازہ ترین اعلامیہ کے مطابق نائب وزیراعظم و وزیر خارجہ اسحاق ڈار نے گزشتہ شب ترک وزیر خارجہ حاقان فیدان سے ٹیلیفونک رابطے کے ذریعے گفتگو کی۔
اعلامیہ کے مطابق دونوں ہم منصب نے آپس میں ابھرتی ہوئی علاقائی صورتحال پر تبادلہ خیال کیا اور بڑھتی ہوئی کشیدگی پر شدید تشویش کا اظہار کیا۔
اعلامیہ میں مزید بتایا گیا کہ وزیر خارجہ اسحاق ڈار نے کشیدگی میں کمی کی فوری ضرورت پر زور دیا اور یہ بھی کہا کہ بات چیت اور سفارت کاری ہی مسائل کے حل اور خطے میں امن و استحکام کو فروغ دینے کا واحد موثر ذریعہ ہے۔
دونوں ممالک کی وزارتِ خارجہ کے مطابق دونوں ہم منصب ریاض میں سعودی عرب کی میزبانی میں آج منعقد ہونے والے علاقائی پیش رفت پر اجلاس میں شرکت کریں گے جہاں دونوں کی اہم ملاقات بھی متوقع ہے۔
