’
ترکیہ کی دفاعی صنعت کی جانب سے پاکستان بحریہ کے لیے تیار کردہ جدید ملجیم کلاس کورویٹ ’’PNS خیبر‘‘ نے براہِ راست فائرنگ کے کامیاب تجربات مکمل کر لیے ہیں اور اب یہ جہاز کراچی روانگی کے لیے تیار ہے۔
ترک خبر ایجنسی آنادولو (AA) کے مطابق، ’’PNS خیبر‘‘ نے سمندری، زمینی اور فضائی اہداف پر فائرنگ کے دوران سو فیصد درستگی کے ساتھ کامیابی حاصل کی۔
ان تجربات کے ذریعے جہاز کی تکنیکی مہارت، سسٹم انضمام (Integration) اور آپریشنل قابلِ اعتمادیت کی مکمل تصدیق ہو گئی ہے۔
یہ جدید جنگی جہاز ترکی کی دفاعی کمپنیوں کے اشتراک سے تیار کیا گیا ہے، جو پاکستان اور ترکیہ کے درمیان دفاعی شراکت داری میں ایک اہم سنگِ میل قرار دیا جا رہا ہے۔
’’PNS خیبر‘‘ میں جدید ریڈار سسٹم، اینٹی شپ اور اینٹی ایئر میزائلز، الیکٹرانک وارفیئر آلات اور جدید کمانڈ اینڈ کنٹرول (C2) سسٹم نصب کیا گیا ہے، جس سے یہ جہاز ایک کثیر المقاصد جنگی پلیٹ فارم کی حیثیت رکھتا ہے۔
یاد رہے کہ اس منصوبے کے تحت بننے والے چار جہازوں میں سے پہلا، ’’PNS بابُر‘‘، مئی 2024 میں پاکستان نیوی کے بیڑے میں شامل کیا جا چکا ہے۔ ’’PNS خیبر‘‘ اس سلسلے کا دوسرا جہاز ہے جو جلد پاکستان پہنچنے والا ہے۔
یہ منصوبہ نہ صرف پاکستان-ترکی دفاعی تعلقات کی مضبوطی کی علامت ہے بلکہ دونوں ممالک کے درمیان ٹیکنالوجی کے اشتراک اور دفاعی خود انحصاری کی سمت ایک اہم قدم بھی ہے۔
