انقرہ —ترکیہ نے اپنے ففتھ جنریشن لڑاکا طیارے "کان” پروگرام میں مصر کی شمولیت کی باضابطہ منظوری دے دی ہے، جس کے بعد دونوں علاقائی طاقتوں کے درمیان فوجی و صنعتی تعاون کے ایک نئے دور کا آغاز ہو گیا ہے۔ اس فیصلے سے نہ صرف دفاعی شعبے میں شراکت داری بڑھے گی بلکہ جدید ٹیکنالوجی اور جنگی صلاحیتوں میں بھی دونوں ممالک کو فائدہ پہنچے گا۔ترک وزارت دفاع کے مطابق، مصر کی شمولیت سے کان پروگرام میں تحقیق، ڈیزائن، پروڈکشن اور ٹیسٹنگ کے مراحل میں قریبی اشتراک ممکن ہو گا۔ دفاعی ماہرین کا کہنا ہے کہ یہ اقدام خطے میں توازنِ طاقت کو نئے زاویے سے متعین کرے گا اور ترکیہ و مصر کے تعلقات میں اسٹریٹجک گہرائی پیدا کرے گا۔کان لڑاکا طیارہ ترکیہ کی دفاعی صنعت کا ایک اہم منصوبہ ہے، جس کا مقصد ملکی سطح پر تیار کردہ جدید ترین ایوی ایشن ٹیکنالوجی سے لیس ففتھ جنریشن طیارہ تیار کرنا ہے۔ مصر کی شمولیت اس منصوبے کو خطے میں ایک بڑی دفاعی کامیابی بنا سکتی ہے۔
