انقرہ —ترکیہ کی دفاعی صنعت نے عالمی منڈی میں اپنی پوزیشن مزید مستحکم کر لی ہے، اور 2025 کے اختتام تک ملکی دفاعی برآمدات 8 بلین ڈالر سے تجاوز کرنے کی توقع ہے۔ اس پیش رفت کا اعلان ترک وزیر تجارت عمر بولات نے ایک حالیہ بیان میں کیا۔وزیر تجارت کے مطابق، ترکیہ کی مقامی دفاعی کمپنیاں ہتھیاروں، ڈرونز، بکتر بند گاڑیوں، میزائل نظاموں اور دیگر جدید دفاعی ٹیکنالوجی میں مسلسل ترقی کر رہی ہیں، جنہیں دنیا کے کئی ممالک میں پذیرائی حاصل ہو رہی ہے۔ انہوں نے بتایا کہ ترکیہ نہ صرف اپنی افواج کی ضروریات پوری کر رہا ہے بلکہ عالمی سطح پر بھی بڑے دفاعی معاہدے کر رہا ہے۔ترک حکومت کی مقامی دفاعی صنعت کو خود کفیل بنانے کی پالیسی اور تکنیکی ترقی کے لیے مسلسل سرمایہ کاری نے اس کامیابی میں اہم کردار ادا کیا ہے۔ وزیر بولات کے مطابق، 2025 کے اختتام تک دفاعی شعبے میں برآمدات کی یہ سطح نہ صرف ترکیہ کی معیشت کے لیے ایک بڑی کامیابی ہوگی بلکہ اس کی جیو اسٹریٹجک اہمیت میں بھی اضافہ کرے گی۔انہوں نے کہا کہ ترکیہ اب محض ایک خریدار نہیں بلکہ ایک قابلِ اعتماد دفاعی سپلائر بن چکا ہے جو عالمی اسلحہ منڈی میں اہم مقام حاصل کر چکا ہے۔
