استنبول —ترکیہ ایک بار پھر عالمی سفارتکاری کے اہم مرکز کے طور پر ابھرا ہے، جہاں ایران اور یورپی ٹرائیکا (برطانیہ، فرانس، جرمنی) کے درمیان اہم جوہری مذاکرات کا آغاز آج استنبول میں ہو رہا ہے۔یہ مذاکرات ایران کے متنازع جوہری پروگرام سے متعلق جاری تناؤ کو کم کرنے اور سفارتی حل کی تلاش کے لیے منعقد کیے جا رہے ہیں۔ ایران کی جانب سے اعلیٰ سطحی نمائندے شریک ہو رہے ہیں جبکہ یورپی وفود بھی ترکیہ پہنچ چکے ہیں۔قابلِ ذکر بات یہ ہے کہ اس سے قبل بدھ کے روز روس اور یوکرین کے درمیان بھی ایک اہم سفارتی اجلاس ترکیہ کی میزبانی میں استنبول میں منعقد ہوا، جس میں جنگ بندی اور انسانی امداد کی راہ ہموار کرنے پر تبادلہ خیال کیا گیا۔ترکیہ کے کردار کو بین الاقوامی سطح پر سراہا جا رہا ہے، جو مشرق اور مغرب کے درمیان پل کا کردار ادا کرتے ہوئے متنازع امور میں ثالثی اور سفارتی گفت و شنید کے لیے ایک قابلِ اعتماد مقام بنتا جا رہا ہے۔ماہرین کا کہنا ہے کہ ان مسلسل سفارتی سرگرمیوں سے یہ واضح ہو رہا ہے کہ ترکیہ نہ صرف خطے بلکہ عالمی سطح پر بھی امن و استحکام کی راہ میں مرکزی حیثیت اختیار کر چکا ہے۔
