پاکستان میں جمہوریہ ترکیہ کے سفیر ڈاکٹر عرفان نذیر اوغلو نے فلاحی ادارے ‘الخدمت فاونڈیشن’ کے مرکزی دفتر، لاہور کا دورہ کیا جہاں الخدمت فاونڈیشن کے صدر پروفیسر ڈاکٹر حفیظ الرحمن اور باقی عہدیداران نے ان کا پرتپاک استقبال کیا۔ اس موقع پر ترک سفیر کو فاونڈیشن کے مختلف ڈیپارٹمنٹس کا تعارف کرایا گیا۔
ڈاکٹر عرفان نے الخدمت فاونڈیشن کے رضاکار کے طور پر خود کو رجسٹر بھی کروایا۔
دورے کے دوران تقریب سے خطاب کرتے ہوئے سفیر ڈاکٹر عرفان نذیر اوغلو نے الخدمت فاونڈیشن کی خدمات کو سراہا اور کہا کہ پاکستان اور ترکیہ کے جھنڈے کی طرح ہمارے دل بھی ایک جیسے ہیں۔
انہوں نے الخدمت فاونڈیشن کے ساتھ فلاحی میدان میں تعاون کو وسعت دینے کے عزم کا اظہار کیا، بالخصوص نوجوان نسل کو ایک دوسرے کے قریب لانے کے لیے مشترکہ منصوبوں پر کام کرنے کی بھی خواہش ظاہر کی۔
علاوہ ازیں، ترک سفیر نے ترکیہ میں آنے والے زلزلے کے دوران الخدمت کے رضاکاروں کی خدمات کو خراج تحسین پیش کی اور ان کے تعاون پر شکریہ ادا کیا۔ ترک سفیر نے مستقبل میں ہر ممکن تعاون کی بھی یقین دہانی کرائی۔
اس موقع پر صدر الخدمت فاونڈیشن پروفیسر ڈاکٹر حفیظ الرحمن نے کہا کہ ترکیہ اور پاکستان مشکل وقت کے ساتھی ہیں اور ترک تنظیموں کے ساتھ اشتراک الخدمت فاونڈیشن کے لیے باعث افتخار ہے۔
تقریب کے اختتام پر صدر الخدمت فاوندیش نے معزز مہمان کو اعزازی شیلڈ، مینار پاکستان کا علامتی ماڈل اور پاکستانی ثقافت کی نمائندہ چادر و ٹوپی بطور تخفہ پیش کئے۔
