ترکیہ کی وزارتِ ثقافت کے ذیلی ادارے ٹِکا کی جانب سے "پاک -ترک دوستی ” میوزیم تیار کر کے ریڈیو پاکستان کے حوالے کر دیا گیا۔ یہ میوزیم اگلے چند روز میں باقاعدہ افتتاح کے بعد عوام کے لیے کھول دیا جائے گا۔
"پاک -ترکیہ دوستی ریڈیو میوزیم ” اپنی نوعیت کا ایک منفرد ڈیجیٹل میوزیم ہے، جِسے ٹکا نے اپنے وسائل سے تیار کیا ہے، اور اِس کی تیاری میں سلجوق دور کا طرزِ تعمیر استعمال کیا گیا ہے۔
ترکیہ کے ادارے ٹِکا کے سربراہ درسن علی یاساگا نے آج ٹِکا اسلام آباد کے ہیڈ کے ہمراہ اِس میوزیم کا باقاعدہ کنٹرول ریڈیو پاکستان کے ڈائریکٹر جنرل سعید احمد شیخ کے سپرد کیا۔
اس میوزیم میں نمائش کیلئے رکھی جانے والی اشیاء کے انتخاب کیلئے ایک کمیٹی قائم کی گئی ہے جس میں میوزیم سازی کے علم میں دسترس رکھنے والی پاکستان کی چیدہ شخصیات کو شامل کیا گیا ہے۔ریڈیوپاکستان کے ڈائریکٹر جنرل کے مطابق اگلے دس دنوں میں اس میوزیم میں نمائش کیلئے رکھے جانے والے آئیٹمز کا تعین مکمل کرلیا جائے گا جس کے بعد وفاقی وزیر اطلاعات و نشریات عطاء اللہ تارڑ اور سیکرٹری محترمہ عنبرین جان اس میوزیم کا باقاعدہ افتتاح کریں گے جس کے بعد اسے عوام کیلئے کھول دیا جائے گا۔
