انقرہ: عالمی یومِ خوراک 2025 کے موقع پر ترک تعاون و رابطہ ایجنسی (TİKA) اور اقوام متحدہ کے خوراک و زراعت کے ادارے (FAO) کے اشتراک سے ’’جنوب-جنوب اور سہ فریقی تعاون پینل‘‘ (South-South and Tripartite Cooperation Panel) کا آغاز کیا گیا۔
اس پینل کا مقصد دنیا میں درپیش خوراک کے بحران، زراعت کے فروغ اور پائیدار ترقی کے لیے مؤثر تعاون کے نئے مواقع پیدا کرنا ہے۔
ٹی آئی کے اے کے مطابق، ادارہ اپنے “ترک طرز کے ترقیاتی ماڈل” کے تحت دنیا بھر میں اپنے شراکت داروں کے ساتھ مل کر خوراک اور زرعی مسائل کے لیے مقامی سے عالمی سطح تک حل پیش کر رہا ہے۔
گزشتہ پانچ برسوں میں ٹی آئی کے اے نے 100 کے قریب ممالک میں 850 سے زائد زرعی و غذائی منصوبے مکمل کیے ہیں، جن کے ذریعے مقامی پیداوار میں اضافہ اور معاشروں کی مزاحمتی و پائیدار ترقی کو فروغ دیا گیا۔
تقریب سے خطاب میں مقررین نے کہا کہ پائیدار ترقی کا حقیقی ہدف صرف امداد فراہم کرنا نہیں بلکہ علم، تجربہ اور اشتراکِ عمل کو فروغ دینا ہے۔
اسی فلسفے کے تحت ٹی آئی کے اے مختلف خطوں میں ترقیاتی تعاون کے نئے ماڈلز پر عمل کر رہی ہے۔
پینل میں مختلف ممالک کے ماہرین، بین الاقوامی تنظیموں کے نمائندوں اور پالیسی سازوں نے شرکت کی، جنہوں نے عالمی خوراک کے چیلنجز اور مشترکہ حل کے لیے اپنے تجربات اور تجاویز پیش کیں۔
