چیئرپرسن کشمیر پیس اینڈ کلچر مشعال حسین ملک نے کہا ہے کہ مقبوضہ کشمیر کی عوام ستر سال بھارت کی دہشتگردفوج کا مقابلہ کرتے رہے اور اب مودی سرکار کے ظالمانہ قوانین کا ظلم و جبر برداشت کررہےہیں،5اگست تاریخ کا وہ سیاہ ترین دن ہے جب مودی سرکار نے بھارتی آئین کے آرٹیکل 135اے اور آرٹیکل 370کو کالعدم قرار دے دیا جس کے بعد بھارتی دہشتگرد نہتے کشمیریوں کی جائیدادوں پر غیر قانونی قبضہ کررہے ہیں۔
ان خیالات کااظہارانہوں نے آج راولپنڈی آرٹس کونسل میں یوم استحصال کشمیر کے حوالے سےمنعقدہ تصویری نمائش کے موقع پر خطاب کرتے ہوئے کیا۔مشال ملک کا کہنا تھا کہ کشمیریوں کے حقوق کو پامال کیا جارہا ہے، ہمیں ہمارے گھروں سے نکالا جارہا ہے، ووٹ کا حق ختم کردیا گیا اور ہماری جن زمینوں پر ملکیت تھی وہ ختم کی جارہی ہے۔
انہوں نے کہا کہ بھارت کو کسی بھی صورت میں مقبوضہ کشمیر پہ راج نہیں کرنے دیں گے اور نہ ہی مودی کا یہ خواب کبھی پورا ہوگا.انہوں نے کہا کہ پاکستانی عوام سے اپیل کرتی ہوں کہ بھارت نے جو گھناؤنا ایکٹ نافذ کر کے اقوام متحدہ کی قراردادوں کی خلاف ورزی کی ہے اس کے خلاف بھرپور آواز اٹھائیں۔
مشعال ملک نے کہا کہ مودی سرکار مقبوضہ کشمیر میں اپنی کالونیاں بنا کر کبھی کامیاب نہیں ہوگا کیونکہ کشمیریوں نے بہت قربانیاں دی ہیں جو کبھی رائیگاں نہیں جائیں گی۔
