اسلام آباد:
تربیلا ڈیم کی مٹی اور تلچھٹ کے تجزیے کے دوران ماہرین نے سونے کے بڑے ذخائر کی موجودگی کا عندیہ دیا ہے جن کی تخمینی مالیت تقریباً 636 ارب ڈالر بتائی جا رہی ہے۔ غیر سرکاری رپورٹس کے مطابق یہ ذخائر پاکستان کے تمام اندرونی و بیرونی قرضوں کے حجم کے برابر یا اس سے زیادہ ہو سکتے ہیں، جس سے ملکی معیشت کے لیے ایک نئی امید پیدا ہوگئی ہے۔
ابتدائی معلومات کے مطابق، تربیلا کے مختلف پوائنٹس سے لیے گئے سیمپلز میں سونے کے قابلِ ذکر ذرات پائے گئے ہیں۔ ماہرین کا کہنا ہے کہ اگر یہ ذخائر تجارتی طور پر قابلِ استخراج ثابت ہوئے تو پاکستان کے مالیاتی مستقبل پر دور رس اثرات مرتب ہو سکتے ہیں۔
تجزیہ کاروں کے مطابق، اس ممکنہ دریافت سے نہ صرف پاکستان کے زرمبادلہ ذخائر اور معاشی اعتماد میں اضافہ ہو سکتا ہے بلکہ ملک میں بڑے پیمانے پر سرمایہ کاری، ٹیکنالوجی ٹرانسفر اور صنعتی سرگرمیوں کے نئے دروازے بھی کھل سکتے ہیں۔
تاہم حکام کا کہنا ہے کہ اس حوالے سے سرکاری سطح پر مزید جیوٹیکنیکل اسٹڈیز، مالیاتی تخمینوں اور تکنیکی جانچ کی ضرورت ہے تاکہ اس بات کی تصدیق ہو سکے کہ آیا یہ ذخائر عملی طور پر قابلِ نکاسی بھی ہیں اور ان کا حجم کتنا ہے۔
معاشی ماہرین نے امید ظاہر کی ہے کہ اگر یہ رپورٹ درست ثابت ہوئی تو یہ پاکستان کی معیشت کے لیے ایک تاریخی پیش رفت ہوگی، جبکہ ماہرین نے اس عمل میں شفافیت اور جدید ٹیکنالوجی کے استعمال پر زور دیا ہے۔
