ریاض / واشنگٹن — سعودی عرب اور امریکہ کے درمیان ایک نئے دفاعی معاہدے پر مذاکرات جاری ہیں، جسے قطر اور امریکہ کے مابین دفاعی معاہدے کے طرز پر تشکیل دیا جا رہا ہے۔
برطانوی جریدے فنانشل ٹائمز کے مطابق مجوزہ معاہدے کے تحت اگر سعودی عرب پر کوئی حملہ کیا جاتا ہے تو اسے امریکہ پر حملہ تصور کیا جائے گا۔ اس کے نتیجے میں امریکہ کو مملکت کے دفاع میں براہِ راست کردار ادا کرنا ہوگا۔
ذرائع کے مطابق معاہدے کا مقصد خطے میں استحکام اور سلامتی کو مضبوط بنانا ہے، جبکہ یہ پیش رفت مشرقِ وسطیٰ میں نئے جیو اسٹریٹیجک توازن کی جانب ایک اہم قدم تصور کی جا رہی ہے۔
یہ مذاکرات اس وقت ہو رہے ہیں جب امریکہ اور سعودی عرب کے تعلقات میں حالیہ برسوں کے دوران دوبارہ گرمجوشی آئی ہے، اور دونوں ممالک دفاعی تعاون، ٹیکنالوجی کے تبادلے اور توانائی کے شعبے میں شراکت داری کو فروغ دینے کے خواہاں ہیں۔
