انقرہ: ترک صدر رجب طیب ایردوان نے کہا ہے کہ امریکی صدر ڈونلڈ ٹرمپ اور روسی صدر ولادیمیر پیوٹن کے درمیان ہونے والا سربراہی اجلاس روس-یوکرین جنگ کو روکنے کی عالمی کوششوں میں ایک نئی امید کی کرن ہے۔ایردوان کے مطابق یہ ملاقات نہ صرف مشرقی یورپ بلکہ پوری دنیا میں امن و استحکام کے لیے ایک مثبت اشارہ ہے۔ انہوں نے کہا کہ "دنیا کو اب مزید جنگ اور تباہی کی نہیں بلکہ مذاکرات اور امن کی ضرورت ہے۔”ترک صدر نے زور دیا کہ ترکیہ ہمیشہ کی طرح امن قائم کرنے کے عمل میں تعمیری کردار ادا کرنے کو تیار ہے۔ انہوں نے اس بات پر بھی روشنی ڈالی کہ روس-یوکرین جنگ نے عالمی معیشت، توانائی کے ذرائع اور خوراک کی فراہمی پر گہرے اثرات ڈالے ہیں، اس لیے اس جنگ کا خاتمہ عالمی برادری کے مشترکہ مفاد میں ہے۔ایردوان نے امید ظاہر کی کہ یہ سربراہی اجلاس محض ایک علامتی ملاقات نہیں ہوگا بلکہ عملی اقدامات کی راہ ہموار کرے گا تاکہ روس اور یوکرین کے درمیان بامعنی مذاکرات دوبارہ شروع ہوسکیں۔
