صدر رجب طیب اردوان نے ٹی آر ٹی کے نئے چینل کے افتتاح کے موقع پر خطاب کرتے ہوئے کہا کہ ٹی آر ٹی کے نام سے منسوب پروڈکشنز کا دنیا کے معتبر ترین فلمی میلوں اور اداروں سے اعزازات کے ساتھ واپس آنا ترکی کے لیے باعثِ فخر ہے۔ انہوں نے کہا کہ ٹی آر ٹی کی مشترکہ پروڈکشن فلم "ٹرائینگل آف سیڈنس” نے 75ویں کانز فلم فیسٹیول میں پام ڈی اور جیت کر پوری قوم کا سر فخر سے بلند کر دیا۔
صدر اردوان نے اس بات کی بھی نشاندہی کی کہ ٹی آر ٹی ورلڈ کی تیار کردہ ایک دستاویزی فلم کو "نیوز اینڈ کرنٹ افیئرز” کے زمرے میں ایمی ایوارڈ سے نوازا گیا، جو ترکی کی تاریخ میں پہلی مرتبہ حاصل ہونے والا یہ اعزاز ہے۔ اسی طرح فلسطین میں قبضے کے سب سے سنگین پہلو یعنی آبادکاروں کے مسئلے کو اجاگر کرنے والی دستاویزی فلم "ہولی ریڈیمپشن” نے عالمی سطح پر گہرا اثر چھوڑا اور وسیع پذیرائی حاصل کی۔
انہوں نے بتایا کہ صرف گزشتہ چار برسوں کے دوران ٹی آر ٹی کی مشترکہ پروڈکشن میں بننے والی تقریباً 100 فلموں نے دنیا کے اہم ترین فلمی میلوں میں قریب 500 ایوارڈز اپنے نام کیے ہیں۔ صدر اردوان نے اس سال 98ویں اکیڈمی ایوارڈز میں بہترین بین الاقوامی فلم کے زمرے میں مقابلہ کرنے والی فلم "فلسطین 36” کے لیے بھی نیک تمناؤں کا اظہار کیا۔
حالیہ برسوں میں ترکی کے سرکاری نشریاتی ادارے ٹی آر ٹی نے بین الاقوامی سنیما اور دستاویزی فلم سازی کے میدان میں اپنی مضبوط موجودگی کا لوہا منوایا ہے۔ ٹی آر ٹی کی پروڈکشنز تحقیقاتی صحافت، انسانی حقوق اور سماجی مسائل جیسے اہم موضوعات پر مبنی ہونے کے باعث عالمی سطح پر نمایاں مقام حاصل کر رہی ہیں۔
نیو یارک فیسٹیولز ٹی وی اینڈ فلم ایوارڈز میں "ہولی ریڈیمپشن” (2025) اور "کینیا – پانی کی جدوجہد” (2024) جیسی فلموں نے گولڈ اور سلور میڈلز حاصل کر کے ترکی کی فلمی صنعت کو عالمی سطح پر مزید متعارف کرایا۔
اس کے علاوہ ٹی آر ٹی ہر سال "ٹی آر ٹی انٹرنیشنل ڈاکومنٹری ایوارڈز” کے عنوان سے ایک عالمی تقریب کا انعقاد کرتا ہے، جس کا مقصد دنیا بھر کے پیشہ ور اور نئے فلم سازوں کی حوصلہ افزائی کرنا ہے۔ ان ایوارڈز کا 16واں ایڈیشن 2025 کے آخر میں منعقد ہوا، جس میں مختلف ممالک کے فلم سازوں نے شرکت کی۔
دستاویزی فلموں کے ساتھ ساتھ ڈرامہ سیریلز کے شعبے میں بھی ٹی آر ٹی کی کامیابیاں قابلِ ذکر ہیں۔ تاریخی ڈرامہ "دستان” نے 2022 کے سیول انٹرنیشنل ڈرامہ ایوارڈز میں نمایاں اعزاز حاصل کر کے ترکی کے ڈرامہ انڈسٹری کو عالمی منظرنامے پر اجاگر کیا۔
مبصرین کے مطابق اعلیٰ پروڈکشن معیار، انسانی کہانیوں اور تحقیقاتی موضوعات پر مبنی مواد نے ٹی آر ٹی کو بین الاقوامی میڈیا میں ایک معتبر اور باوقار ادارے کے طور پر قائم کر دیا ہے، جو مستقبل میں بھی عالمی سطح پر ترکی کی نمائندگی کرتا رہے گا۔
