وزیراعظم پاکستان محمد شہباز شریف نے پیر کے روز بنگلہ دیش کی سابق وزیرِاعظم اور بنگلہ دیش نیشنلسٹ پارٹی (بی این پی) کی چیئرپرسن بیگم خالدہ ضیا کے انتقال پر تعزیت کے لیے اسلام آباد میں بنگلہ دیش ہائی کمیشن کا دورہ کیا۔
وزیراعظم نے بنگلہ دیش کے ناظم الامور سے ملاقات کے دوران حکومتِ پاکستان اور پاکستانی عوام کی جانب سے دلی تعزیت کا اظہار کیا، تعزیتی کتاب میں اپنے تاثرات قلم بند کیے اور مرحومہ کی مغفرت کے لیے فاتحہ خوانی بھی کی۔
اپنے تعزیتی پیغام میں وزیراعظم نے بیگم خالدہ ضیا کو خراجِ عقیدت پیش کرتے ہوئے انہیں ایک دوراندیش رہنما اور ممتاز سیاسی شخصیت قرار دیا، جنہوں نے اپنی پوری زندگی عوامی خدمت اور جمہوری جدوجہد کے لیے وقف کیے رکھی۔
وزیراعظم شہباز شریف نے مرحومہ کو پاکستان کی مخلص دوست قرار دیتے ہوئے کہا کہ بیگم خالدہ ضیا ایک ایسی سیاسی رہنما تھیں جنہوں نے بنگلہ دیش کی سیاست میں گہرے اور دیرپا نقوش چھوڑے، اور ان کی خدمات ایک متاثرکن ورثے کی صورت میں ہمیشہ یاد رکھی جائیں گی۔ انہوں نے کہا کہ مرحومہ کی سیاسی بصیرت، جمہوری اقدار سے وابستگی اور عوام کے لیے خدمات آئندہ نسلوں کے لیے مشعلِ راہ رہیں گی۔
وزیراعظم نے حکومت اور عوامِ پاکستان کی جانب سے بیگم خالدہ ضیا کے اہلِ خانہ، ان کے چاہنے والوں اور بنگلہ دیش کے عوام سے دلی ہمدردی اور تعزیت کا اظہار کیا، اور دعا کی کہ اللہ تعالیٰ مرحومہ کو جنت الفردوس میں اعلیٰ مقام عطا فرمائے اور پسماندگان کو یہ صدمہ صبر و حوصلے سے برداشت کرنے کی توفیق دے۔
اس موقع پر وفاقی وزیر اطلاعات و نشریات عطااللہ تارڑ اور وزیراعظم کے خصوصی معاون طارق فاطمی بھی وزیراعظم کے ہمراہ تھے۔
