پاکستانی فلم ” لندن نہیں جاؤں گی” کی شوٹنگ استنبول میں کرنے کا فیصلہ کیا گیا ہے ، فلم کے مرکزی کرداروں میں ہمایوں سعید اور مہوش حیات نظر آئیں گے۔
فلم کے پروڈیوسر عرفان ملک نے میڈیا سے گفتگو کرتے ہوئے بتایا کہ یہ ان کی استنبول میں شوٹ کی جانے والی تیسری فلم ہے اور وہ ترکی کو اپنا دوسرگھر سمجھتے ہیں۔
ان کا کہنا تھا کہ ترکی میں فلم بندی کے لیے بہترین تکنیکی سہولیات موجود ہیں اور ترکی کی ٹی وی انڈسٹری بھی وسیع ہے ، انہوں نے زور دیتے ہوئے کہا کہ یہاں 8 ہزار فلم تھیٹر ہیں۔ میں چاہوں گا کہ میری فلمیں بھی یہاں ریلیز ہوں۔” پاکستانی ٹیلی ویژن پر ترک ٹی وی سیریز دکھائی جاتی ہیں، لیکن پاکستانی سینما گھروں میں ترک فلمیں نہیں دکھائی جاتیں۔
ہم دونوں ممالک کے درمیان بھائی چارے اور اچھے تعلقات کو مزید مضبوط بنانے کے لیے اس شعبے میں اقدامات کرنا چاہتے ہیں۔
پروڈیوسر کا کہنا تھا کہ وہ اپنی نئی فلم کی ترکی میں نمائش کے خواہش مند ہیں اور اس سلسلے میں ڈسٹریبیوٹرکے ساتھ بات چیت کر رہے ہیں، ان کا مزید کہنا تھا کہ میرا مقصد اس فلم کو سب ٹائٹلز اور ڈبنگ کے ساتھ ترکی میں نشر کرنا ہے۔ اس طرح یہ ترکی میں نشر ہونے والی پہلی پاکستانی فلم ہوگی ۔
فلم کے مرکزی اداکار ہمایوں سعید کا کہنا تھا کہ میں ترکی میں بہت خوش ہوں ، تما م پاکستانی ترکی سے محبت کرتے ہیں اور ترک بھی ہم سے محبت کرتے ہیں اور احترام سے پیش آتے ہیں۔
علاوہ ازیں مرکزی اداکارہ مہوش حیات نے بتایا کہ فلم کا ایک حصہ پاکستان میں شوٹ کیا جائے گا جبکہ دوسر ے حصہ ترکی میں شوٹ ہو گا۔
فلم میں کبرا خان، واسے چودھری، سہیل احمد اور گوہر رشید بھی اہم کرداروں میں نظر آئیں گے
