ترکیہ میں پاکستان کے سفیر ڈاکٹر یوسف جنید نے تُرک ارکانِ پارلیمنٹ، نائب وزرا، اداروں کے سربراہان اور پاک تُرک کمیونٹی کے کئی دیگر ممتاز افراد کے اعزاز میں انقرہ کے پاکستانی سفارتخانے میں افطار کے کھانے کا اہتمام کیا۔
پروگرام میں شرکت کرنے والے اہم مہمانوں میں حکمران جماعت اَق پارٹی کے رکنِ پارلیمنٹ اور ترکیہ پاکستان پارلیمانی دوستی گروپ کے چیئرمین علی شاہین کے علاوہ پاکستان سے گہرے تعلقات رکھنے والے اَق پارٹی کے ایک اور رکنِ پارلیمنٹ اور قومی اسمبلی کی یورپی یونین سے متعلقہ کمیٹی کے چیئرمین برہان کایاتُرک شامل تھے۔
پاکستانی سفیر ڈاکٹر یوسف جنید نے مہمانوں کا بھرپور انداز سے استقبال کیا۔ ساتھ ہی دونوں ملکوں کے افراد کے درمیان گفت و شنید جاری رہی۔ مختلف قسم کے پکوان سے سجی ہوئی میز پر مل کر افطار کی گئی۔اس برادرانہ ماحول نے پاک ترک بھائی چارے کے جذبات اور دو طرفہ تعلقات کی گہرائی کی عکاسی کی۔
رکنِ پارلیمنٹ علی شاہین نے اپنے سوشل میڈیا ہینڈل کے ذریعے حالیہ بیان میں پاکستانی سفیر کا شکریہ ادا کرتے ہوئے کہا کہ انقرہ میں پاکستان کے سفیر جناب یوسف جنید کی مہمان نوازی میں افطار کرنے کے ساتھ ساتھ علاقائی حالات پر تبادلہ خیال کیا۔
علی شاہین کا کہنا تھا کہ پاکستان اور ترکیہ کے درمیان بھائی چارہ "دو ریاستیں، ایک قوم” کے نظریے کی ایک بہترین اور کامل مثال ہے، جو بغیر کسی اعتراض یا استثناء کے مجسم ہے۔
اپنے پیغام میں مزید کہا کہ پاکستان اور ترکیہ کے درمیان بھائی چارہ جس کی تقدیر اللّٰہ نے لکھی ہے، ہمیشہ قائم رہے گا۔
سفارتخانے کے ذرائع کا کہنا تھا کہ اس خوشگوار ماحول میں رمضان المبارک کے مقدس مہینے کے موقع پر پوری امتِ مسلمہ میں امن اور اتفاق کے لیے خصوصی طور پر دعائیں بھی کی گئیں
