راولپنڈی — (آئی ایس پی آر) — پاک بحریہ کے سربراہ ایڈمرل نوید اشرف کو ترکیہ کے سرکاری دورے کے دوران اعلیٰ عسکری اعزاز "لیجن آف میرٹ آف دی ترک آرمڈ فورسز” سے نوازا گیا۔ یہ اعزاز ترک نیول فورسز کے ہیڈکوارٹرز میں ایک پروقار تقریب کے دوران دیا گیا، جہاں ان کے اعزاز میں گارڈ آف آنر بھی پیش کیا گیا۔ایڈمرل نوید اشرف نے ترک نیول فورسز کے کمانڈر سمیت ترک وزیر دفاع، چیف آف جنرل اسٹاف اور کمانڈر ترکش نیوی فلیٹ سے الگ الگ ملاقاتیں کیں۔ ان ملاقاتوں میں دوطرفہ بحری تعاون، علاقائی میری ٹائم سیکیورٹی، دفاعی شراکت داری، مشترکہ مشقوں اور تربیتی صلاحیتوں کے فروغ پر تفصیلی تبادلہ خیال کیا گیا۔دورے کے دوران سربراہ پاک بحریہ نے استنبول نیول شپ یارڈ میں ملجم پراجیکٹ کا جائزہ لیا، گولچک نیول بیس کا دورہ کیا اور آبدوزوں کی تعمیراتی صلاحیتوں کا معائنہ کیا۔ انہوں نے ترکش نیول فلیٹ کے متعدد جہازوں اور نیول تنصیبات کا بھی دورہ کیا اور مصطفیٰ کمال اتاترک کے مزار پر پھول چڑھائے۔ترکیہ کا یہ دورہ دونوں برادر ممالک کے درمیان بحری تعاون کو مزید وسعت دینے اور دفاعی تعلقات کو نئی جہت دینے کا باعث بنے گا۔
