پاکستان نے قطر کو دفاعی تعاون اور مشترکہ پیداوار کی پیشکش کی ہے، جس کے بعد دونوں ممالک کے درمیان دفاعی شراکت داری کے ایک نئے دور کا آغاز متوقع ہے۔
ذرائع کے مطابق، یہ پیشکش اسلام آباد اور دوحہ کے درمیان جاری اعلیٰ سطحی رابطوں کے دوران کی گئی۔ پاکستان نے قطر کو جدید دفاعی سازوسامان، تربیت، اور ٹیکنالوجی ٹرانسفر میں شراکت داری کی پیشکش دی ہے، تاکہ خطے میں دفاعی تعاون کو مزید مضبوط بنایا جا سکے۔
قطری امیر شیخ تمیم بن حمد الثانی نے پاکستان کی پیشکش پر مثبت ردِعمل دیا ہے اور متعلقہ حکام کو معاہدے کو عملی شکل دینے کے لیے اقدامات تیز کرنے کی ہدایت کی ہے۔
ذرائع کا کہنا ہے کہ دونوں ممالک کے درمیان ممکنہ دفاعی معاہدے میں مشترکہ پیداوار، مرمت و دیکھ بھال کے مراکز (MRO)، اور عسکری تربیت کے شعبے شامل ہوں گے۔ اس سے نہ صرف دوطرفہ تعاون میں اضافہ ہوگا بلکہ خلیجی خطے میں پاکستان کے دفاعی تعلقات بھی نئی سطح پر پہنچ جائیں گے۔
تجزیہ کاروں کے مطابق، پاک قطر دفاعی تعاون کا یہ نیا باب خطے میں استحکام اور اسٹریٹجک توازن کو فروغ دے گا، جبکہ پاکستان کے دفاعی برآمدات کے امکانات میں بھی نمایاں اضافہ ہوگا۔
