دوحہ – وزیراعظم پاکستان میاں محمد شہباز شریف اسرائیل کے حالیہ حملے کے بعد برادر ملک قطر سے اظہارِ یکجہتی اور مکمل تعاون کے لیے خصوصی دورے پر آج دوحہ پہنچ گئے۔ایئرپورٹ پر قطر کے امیر شیخ تمیم بن حمد الثانی نے وزیراعظم کا پرتپاک خیر مقدم کیا۔
دونوں رہنماؤں نے گرمجوشی سے ملاقات کی اور گلے مل کر بھائی چارے کے رشتے کو مزید مستحکم کرنے کے عزم کا اعادہ کیا۔ استقبال کے موقع پر قطری کابینہ کے اہم وزراء اور پاکستان کے اعلیٰ حکام بھی موجود تھے۔
وزیراعظم شہباز شریف اپنے قیام کے دوران قطری قیادت کے ساتھ تفصیلی مذاکرات کریں گے جن میں خطے کی تازہ صورتحال، اسرائیلی حملے کے بعد کے حالات، فلسطینی عوام کے حقِ خودارادیت کی حمایت اور باہمی تعلقات کے فروغ پر بات چیت ہوگی۔وزیراعظم نے روانگی سے قبل کہا کہ پاکستان ہمیشہ قطر کے ساتھ کھڑا ہے اور مشکل گھڑی میں برادر ملک کی مکمل حمایت کرتا ہے۔
انہوں نے کہا کہ پاکستان اور قطر کے تعلقات محض سفارتی نہیں بلکہ دینی، تاریخی اور ثقافتی رشتوں پر مبنی ہیں۔سرکاری ذرائع کے مطابق اس دورے کے دوران دونوں ممالک کے درمیان مختلف شعبوں میں تعاون بڑھانے پر بھی بات چیت ہوگی، خصوصاً توانائی، سرمایہ کاری، تجارت اور افرادی قوت کے شعبوں میں شراکت داری پر غور کیا جائے گا۔
ذرائع کا کہنا ہے کہ وزیراعظم شہباز شریف اور امیرِ قطر شیخ تمیم بن حمد الثانی ایک مشترکہ اعلامیہ بھی جاری کریں گے جس میں اسرائیلی جارحیت کی مذمت اور امتِ مسلمہ کے اتحاد پر زور دیا جائے گا۔پاکستانی سفارتی حلقوں کا ماننا ہے کہ یہ دورہ نہ صرف پاکستان-قطر تعلقات کو نئی جہت دے گا بلکہ خطے میں امن اور یکجہتی کے لیے بھی ایک اہم سنگِ میل ثابت ہوگا۔
