لاہور — سینئر صحافی اور تجزیہ کار نجم سیٹھی نے خبردار کیا ہے کہ پاکستان کو اس وقت اندرونی اور بیرونی دونوں محاذوں پر سنگین چیلنجز کا سامنا ہے۔
اپنے حالیہ سیاسی تجزیے میں نجم سیٹھی نے کہا کہ اگر افغانستان کی جانب سے جارحیت ہوتی ہے اور اسی وقت بھارت بھی حملہ کر دیتا ہے، تو پاکستان کو بیک وقت دو سرحدوں پر دشمن کے حملوں کا سامنا کرنا پڑ سکتا ہے، جو ایک غیر معمولی صورتحال ہوگی۔
انہوں نے کہا:
"ہمیں نہ صرف بیرونی خطرات لاحق ہیں بلکہ اندرونی طور پر بھی صورتحال بگڑ رہی ہے۔ ملک میں سیاسی انتشار بڑھ رہا ہے، اداروں کے درمیان ہم آہنگی کم ہو رہی ہے، اور ایک پاپولر جماعت نے ایسا وزیراعلیٰ بنایا ہے جو کھلے عام کہتا ہے کہ وہ اسٹیبلشمنٹ کی بات نہیں مانتا۔”
نجم سیٹھی کے مطابق ملک کو اس وقت سیاسی استحکام، قومی یکجہتی اور ادارہ جاتی ہم آہنگی کی سخت ضرورت ہے، کیونکہ دشمن قوتیں پاکستان کی کمزوریوں سے فائدہ اٹھا سکتی ہیں۔
انہوں نے کہا کہ ایسے حالات میں حکومت، اپوزیشن اور ریاستی اداروں کو ایک صفحے پر آنا چاہیے، ورنہ پاکستان کے سلامتی کے خطرات میں اضافہ ہو سکتا ہے۔
