سعودی حکومت نے ماہ رمضان میں مسجد الحرام اور مسجد نبوی کے حوالے سے پلان جاری کر دیا۔ سعودی میڈیا کے مطابق مسجد الحرام اور مسجد نبوی کے امور کے سربراہ ڈاکٹر عبدالرحمان السدیس نے عالمی وبا کورونا وائرس کی مناسبت سے دونوں مساجد کا پلان جاری کیا۔
ڈاکٹرعبدالرحمان السدیس نے دونوں مساجد میں آنے والے زائرین کو اپنی اور دوسروں کی صحت کا تحفظ یقینی بنانے کے لیے کورونا ویکسین لینے پر زور دیا ہے۔
مساجد کی پریزیڈینسی نے کہا کہ ماہ رمضان میں زائرین کی صحت کے تحفظ کے لیے اقدامات کیے گئے ہیں تاکہ کورونا وبا کے پھیلاو پر قابو پایا جا سکے۔ تاہم انتطامیہ کی جانب سے مساجد میں آنے والے کے لیے سہولیات کی فراہمی کو ممکن بنایا جا رہا ہے۔
انہوں نے بتایا کہ آپریشن پلان کے تحت مسجد الحرام میں نماز کے لیے مشرقی صحن سمیت پانچ مقامات کا تعین کیا گیا ہے اور خصوصی افراد کی عبادت کے لیے الگ جگہ رکھی گئی ہے جب کہ عمرہ معتمرین کو پورے ماہ پہلی منزل سے طواف کرنے کی اجازت ہوگی۔
ڈاکٹر عبدالرحمان السدیس کے مطابق ماہِ رمضان میں مسجد الحرام سے آبِ زم زم کے کولرز ہٹالیے جائیں گے تاہم اس دوران انتظامیہ روزانہ کی بنیاد پر زم زم کی 2 لاکھ بوتلیں فراہم کرے گی۔
آپریشن پلان کے مطابق مسجد الحرام اور مسجد نبویؐ میں روزہ کھولنے کے خواہش مند افراد کو صرف ذاتی پانی اور کھجور سے روزہ کھولنے کی اجازت ہوگی جب کہ اس دوران کسی چیز کے تبادلے اور تقسیم کی اجازت نہیں دی جائے گی۔ اس کے علاوہ دونوں مساجد یا ان کے صحن میں کسی بھی کھانے کی چیز کے ساتھ جانے کی اجازت نہیں ہوگی تاہم مساجد میں روزہ کھولنے والوں کو پیکٹ فراہم کیے جائیں گے اور یہ پیکٹ علیحدہ علیحدہ فراہم کیے جائیں گے۔
