کویت کے ولی عہد شیخ صباح الخالد الحمد الصباح نے پاکستان کی اُن سفارتی کوششوں کو سراہتے ہوئے مکمل حمایت کا اظہار کیا ہے جو وہ امریکہ اور ایران کے درمیان بڑھتی ہوئی کشیدگی کو کم کرنے اور ثالثی کے لیے کر رہا ہے۔ یہ مؤقف پاکستان کے وزیراعظم آفس کی جانب سے جاری بیان میں سامنے آیا۔
وزیراعظم پاکستان شہباز شریف کے ساتھ ٹیلیفونک گفتگو میں کویتی قیادت کو پاکستان کی خطے میں امن و استحکام کے لیے جاری سفارتی کوششوں سے آگاہ کیا گیا۔ گفتگو کے دوران ولی عہد نے پاکستان کے متوازن اور فعال کردار کو قابلِ تحسین قرار دیا، جبکہ دونوں رہنماؤں نے علاقائی تعاون اور استحکام کے امکانات پر تبادلہ خیال کیا۔
وزیراعظم نے اس موقع پر کویت پر ہونے والے حالیہ واقعات کی مذمت کرتے ہوئے کویتی عوام کے ساتھ یکجہتی کا اظہار کیا اور جاں بحق افراد کے لیے تعزیت پیش کی۔ ولی عہد نے پاکستان کی حمایت اور یکجہتی پر شکریہ ادا کیا اور حالات سازگار ہونے پر پاکستان کے دورے کی خواہش بھی ظاہر کی۔3
دوسری جانب سفارتی حلقوں کے مطابق پاکستان اس وقت خطے میں ایک اہم سہولت کار کے طور پر ابھر رہا ہے، جہاں وہ ترکیہ اور مصر کے تعاون سے واشنگٹن اور تہران کے درمیان بالواسطہ رابطوں کو آگے بڑھا رہا ہے۔ یہ رابطے براہِ راست مذاکرات کے بجائے منظم پیغامات کے تبادلے کی صورت میں جاری ہیں۔
اس عمل میں اعلیٰ سطحی روابط شامل ہیں، جن میں چیف آف آرمی اسٹاف جرنل عاصم منیر کے ایرانی وزیر خارجہ عباس عراقچی کے ساتھ رابطے نمایاں ہیں، تاکہ دونوں فریقوں کے مؤقف کو ایک دوسرے تک مؤثر انداز میں پہنچایا جا سکے۔
