استنبول: ترکیہ کا استنبول ایئرپورٹ دنیا کے بہترین ایئرپورٹس میں پہلا مقام حاصل کرتے ہوئے عالمی سطح پر ایک بار پھر نمایاں قرار پایا ہے۔
یہ اعلان معروف بین الاقوامی ٹریول میگزین کونڈے ناسٹ ٹریولر (Condé Nast Traveler) کی جانب سے جاری کردہ سالانہ رینکنگ میں کیا گیا۔
میگزین کے مطابق، استنبول ایئرپورٹ نے اپنی جدید سہولیات، مؤثر انتظامی نظام، مسافروں کی سہولت، آرکیٹیکچرل ڈیزائن، اور عالمی کنیکٹیویٹی کی بدولت یہ اعزاز حاصل کیا۔
رپورٹ میں کہا گیا کہ استنبول ایئرپورٹ نے نہ صرف یورپ بلکہ عالمی سطح پر بھی ایوی ایشن کا نیا معیار قائم کیا ہے، اور مختصر مدت میں دنیا کے مصروف ترین ایئر ہبز میں شامل ہو گیا ہے۔
استنبول ایئرپورٹ نے افتتاح کے بعد سے ہی اپنے وسیع نیٹ ورک، آرام دہ مسافر خدمات، اور ڈیجیٹل سہولیات کے باعث عالمی سیاحوں اور ائیر لائنز کی اولین ترجیح بننے کا اعزاز حاصل کیا ہے۔
یہ اعزاز ترکیہ کی فضائی صنعت کے لیے ایک اہم سنگِ میل تصور کیا جا رہا ہے، جو ملک کے سیاحت، تجارت اور بین الاقوامی رابطوں کو مزید فروغ دینے میں مددگار ثابت ہوگا۔
