مقبوضہ مغربی کنارے کے شمالی شہر نابلس کے مشرق میں واقع پرانے عسکر پناہ گزین کیمپ پر پیر کی صبح اسرائیلی فوج نے چھاپہ مار کارروائی کی اور علاقے میں مزید فوجی دستے تعینات کر دیے۔
عینی شاہدین کے مطابق اسرائیلی افواج نے علی الصبح کیمپ میں فوجی آپریشن کا آغاز کیا۔ پیدل فوج کے اہلکار مختلف محلوں میں پھیل گئے، متعدد فلسطینی گھروں میں داخل ہو کر تلاشی لی اور کئی افراد کو حراست میں لے لیا۔
شاہدین نے بتایا کہ فوج نے کئی گھروں کو خالی کرا کے انہیں عارضی فوجی بیرکوں میں تبدیل کر دیا اور مکینوں کو آگاہ کیا کہ آپریشن تین روز تک جاری رہے گا۔ اس دوران کیمپ کے داخلی اور خارجی راستوں پر سخت پابندیاں عائد کر دی گئیں اور نقل و حرکت محدود کر دی گئی۔
اسرائیلی فوج کا کہنا ہے کہ وہ مقبوضہ مغربی کنارے کے شہروں، قصبوں اور پناہ گزین کیمپوں میں مطلوب افراد کی تلاش کے لیے باقاعدگی سے کارروائیاں کرتی ہے۔
فلسطینی ذرائع کے مطابق اکتوبر 2023 میں غزہ میں جنگ شروع ہونے کے بعد مغربی کنارے میں فوجی سرگرمیوں میں نمایاں اضافہ ہوا ہے، جن میں ہلاکتیں، گرفتاریاں، جبری بے دخلی اور بستیوں کی توسیع شامل ہیں۔
رپورٹس کے مطابق اب تک مغربی کنارے اور مقبوضہ مشرقی یروشلم میں ایک ہزار 118 سے زائد فلسطینی شہید، تقریباً 11 ہزار 700 زخمی اور لگ بھگ 22 ہزار افراد کو حراست میں لیا جا چکا ہے۔
