ایران کے رہبرِ اعلیٰ آیت اللہ علی خامنہ ای نے امریکہ کو خبردار کرتے ہوئے کہا ہے کہ امریکی فوج دنیا کی طاقتور فوج ہونے کے باوجود بھی غیر متوقع حملوں یا ہتھیاروں سے شدید نقصان اٹھا سکتی ہے۔
منگل کو اپنے ایکس (سابقہ ٹویٹر) اکاؤنٹ پر جاری کیے گئے پیغام میں انہوں نے کہا کہ امریکی صدر اکثر دعویٰ کرتے ہیں کہ ان کی فوج سب سے طاقتور ہے، لیکن طاقتور ترین فوج بھی کبھی ایسی چوٹ کھا سکتی ہے کہ وہ دوبارہ کھڑی نہ ہو سکے۔
خامنہ ای نے مزید کہا کہ امریکہ مسلسل یہ کہہ رہا ہے کہ اس نے ایران کی طرف ایک جنگی جہاز بھیجا ہے۔ ظاہر ہے کہ ایک جنگی جہاز خطرناک عسکری شہ ہے، مگر اس سے بھی زیادہ خطرناک وہ ہتھیار ہے جو کسی جنگی جہاز کو سمندر کی تہہ میں غرق کر سکتا ہے۔
یہ بیان ایسے وقت میں سامنے آیا ہے جب اطلاعات گردش کر رہی ہیں کہ امریکہ نے یو ایس ایس جیرلڈ آر فورڈ نامی جدید بحری جہاز مشرقِ وسطیٰ کی طرف روانہ کیا ہے۔ اس پیش رفت کے بعد ایران کی جانب سے محتاط مگر سخت پیغام جاری کیا گیا ہے، جو خطے میں جاری کشیدگی کے تناظر میں تشویش پیدا کر رہا ہے۔
