ایران کے صدر ڈاکٹر مسعود پزشکیان نے چین-پاکستان اقتصادی راہداری (CPEC) میں فعال شرکت کی خواہش کا اظہار کرتے ہوئے کہا ہے کہ ایران اس تاریخی منصوبے کے ذریعے شاہراہ ریشم (Silk Road) سے منسلک ہو سکتا ہے، جو ایران کے راستے یورپ تک پھیلایا جا سکتا ہے۔صدر پزشکیان نے اپنے بیان میں کہا کہ سی پیک نہ صرف پاکستان بلکہ پورے خطے کے لیے اقتصادی ترقی کا ایک مثالی ماڈل ہے، اور ایران اس منصوبے کا قدرتی حصہ بن کر علاقائی تعاون اور تجارتی روابط کو نئی وسعت دینا چاہتا ہے۔انہوں نے مزید کہا کہ ایران کی جغرافیائی پوزیشن اسے یورپ، وسطی ایشیا اور مشرق وسطیٰ کے ساتھ جوڑنے میں کلیدی کردار ادا کر سکتی ہے۔ اگر ایران کو سی پیک کا حصہ بنایا جائے تو یہ راہداری ایک بین الاقوامی تجارتی زون میں تبدیل ہو سکتی ہے، جس سے نہ صرف علاقائی بلکہ عالمی معیشت کو فائدہ پہنچے گا۔ایرانی صدر نے پاکستان اور چین سے اپیل کی کہ وہ ایران کو سی پیک کے تحت جاری منصوبوں میں شراکت دار بنانے پر سنجیدگی سے غور کریں تاکہ ایک مضبوط، مربوط اور پرامن علاقائی تعاون کا خواب شرمندۂ تعبیر ہو سکے۔سیاسی تجزیہ کار اس بیان کو ایران کی علاقائی اقتصادیات میں فعال شمولیت کی ایک بڑی پیش رفت قرار دے رہے ہیں، جس سے خطے میں معاشی اتحاد اور تجارتی رابطے نئی بلندیوں کو چھو سکتے ہیں۔
