جکارتہ — انڈونیشیا نے چین کے ساتھ ایک بڑا دفاعی معاہدہ کر لیا ہے جس کے تحت وہ 42 جے-10 سی (J-10C) جدید لڑاکا طیارے خریدے گا۔ اس معاہدے کی مالیت 9 ارب ڈالر سے زائد بتائی جا رہی ہے، جو انڈونیشیا کی تاریخ کا سب سے بڑا دفاعی معاہدہ قرار دیا جا رہا ہے۔
یہ پہلا موقع ہے کہ انڈونیشیا نے مغربی ممالک سے ہٹ کر چین کے ساتھ اتنے بڑے پیمانے پر دفاعی تعاون کا فیصلہ کیا ہے۔ ماہرین کے مطابق یہ اقدام خطے میں نئے جیو پولیٹیکل توازن کو جنم دے گا۔
ذرائع کے مطابق، جے-10 سی طیارے چینی فضائیہ کے جدید ترین جنگی جہازوں میں شمار ہوتے ہیں جو اعلیٰ ایویونکس، ریڈار سسٹمز، اور میزائل صلاحیتوں سے لیس ہیں۔
دفاعی مبصرین کا کہنا ہے کہ انڈونیشیا کا یہ فیصلہ چین–جنوب مشرقی ایشیا دفاعی تعلقات کو نئی بلندیوں تک لے جائے گا۔
قابلِ ذکر بات یہ ہے کہ پاکستان نے انہی جے-10 سی طیاروں کے ذریعے معرکۂ حق میں بھارت کے خلاف فیصلہ کن برتری حاصل کی تھی، جس کے بعد ان طیاروں کی جنگی صلاحیتوں کو عالمی سطح پر سراہا گیا۔
ماہرین کے مطابق، انڈونیشیا کا یہ معاہدہ نہ صرف اس کی فضائی طاقت میں اضافہ کرے گا بلکہ خطے میں دفاعی توازن بھی نئی سمت اختیار کرے گا۔
