ترکیہ کے صدر رجب طیب اردوان نے نئے سال کے آغاز پر سب سے پہلے فلسطین کی صورتحال پر واضح اور سخت مؤقف اختیار کرتے ہوئے کہا ہے کہ فلسطین تنہا نہیں اور اسرائیل کی دشمنی بغیر جواب کے نہیں رہے گی۔ صدر اردوان نے کہا کہ نئے سال کے موقع پر غلطہ پل پر دنیا نے ایک تاریخی منظر دیکھا، جو فلسطینی عوام کے ساتھ ترکیہ کی غیر متزلزل حمایت کا پیغام تھا۔
صدر اردوان نے اس کے بعد ایک بڑی سفارتی پیش رفت کا اعلان کرتے ہوئے بتایا کہ وہ پیر کے روز امریکی صدر ڈونلڈ ٹرمپ سے ملاقات کریں گے۔ اس ملاقات میں روس-یوکرین جنگ اور فلسطین کے مسئلے پر تفصیلی بات چیت کی جائے گی۔ ان کے مطابق یہ ملاقات عالمی اور علاقائی معاملات میں اہم پیش رفت کا باعث بن سکتی ہے۔
صدر اردوان نے ترکیہ کی معاشی صورتحال پر روشنی ڈالتے ہوئے کہا کہ ملک نے 2026 کا آغاز مثبت حالات میں کیا ہے۔ ان کا کہنا تھا کہ مہنگائی میں کمی آ رہی ہے اور مرکزی بینک کے زرِ مبادلہ کے ذخائر میں روز بروز بہتری دیکھنے میں آ رہی ہے۔
صدر اردوان نے امید ظاہر کی کہ 2026 ترکیہ کے لیے کامیابیوں سے بھرپور سال ثابت ہوگا۔
