انقرہ — ترکیہ کے صدر رجب طیب ایردوان نے جرمنی پر زور دیا ہے کہ وہ غزہ میں جاری انسانی بحران اور اسرائیل کی کارروائیوں کو روکنے کے لیے فوری اور واضح کردار ادا کرے۔ انہوں نے کہا کہ غزہ میں فلسطینیوں کے خلاف جو کچھ ہو رہا ہے وہ "نسل کشی” کے مترادف ہے اور عالمی برادری خصوصاً یورپی ممالک کو اس پر خاموش نہیں رہنا چاہیے۔
صدر ایردوان نے کہا کہ جرمنی کا عالمی سیاست میں اہم مقام ہے، اس لیے اسے ذمہ داری نبھاتے ہوئے فوری جنگ بندی، انسانی امداد کی فراہمی اور فلسطینی شہریوں کے تحفظ کے لیے عملی اقدامات کرنے چاہئیں۔
انہوں نے مزید کہا کہ ترکیہ ہر سطح پر فلسطینی عوام کی حمایت جاری رکھے گا اور انصاف، امن اور خطے کے استحکام کے لیے اپنی کوششیں جاری رکھے ہوئے ہے۔
ترک صدر نے کہا کہ موجودہ صورتحال بین الاقوامی قانون اور انسانی ضمیر دونوں کے لیے ایک بڑا امتحان ہے، اور تاریخ اُن ممالک کو یاد رکھے گی جو ظلم کے خلاف کھڑے ہوئے اور اُنہیں بھی جو خاموش رہے۔
