پاکستانی فوج کے موجودہ سربراہ جنرل سید عاصم منیر کو حکومتِ پاکستان نے ملک کی عسکری تاریخ کے ایک اہم اور منفرد اعزاز سے نوازتے ہوئے "فیلڈ مارشل” کے اعلیٰ رُتبے پر فائز کر دیا ہے۔ یہ اعلان ایک ایسے وقت میں سامنے آیا ہے جب پاکستان کی عسکری قیادت نے حالیہ انڈیا کے ساتھ کشیدگی میں مضبوط اعصاب اور بہترین حکمت عملی کا مظاہرہ کیا۔
جنرل عاصم منیر پاکستان آرمی کے ان گنے چنے افسران میں شامل ہیں جنہوں نے ملٹری انٹیلیجنس (MI) اور انٹر سروسز انٹیلیجنس (ISI) دونوں اداروں کی قیادت کی۔ 24 نومبر 2022 کو وزیراعظم شہباز شریف نے انہیں تین سال کے لیے پاکستان کا 17واں چیف آف آرمی اسٹاف مقرر کیا۔
ان کی عسکری خدمات میں XXX کور (گوجرانوالہ) کی کمان، جی ایچ کیو میں کوارٹر ماسٹر جنرل کی حیثیت سے خدمات، اور اہم قومی سلامتی آپریشنز کی نگرانی شامل ہے۔
ان کی شخصیت کا روحانی پہلو
جنرل عاصم منیر صرف ایک اعلیٰ فوجی افسر ہی نہیں بلکہ حافظِ قرآن بھی ہیں۔ انہوں نے 1974 میں قرآن مجید حفظ کیا اور مدرسے میں اپنی خداداد ذہانت سے اساتذہ کو متاثر کیا۔ ان کا تعلق راولپنڈی کے علاقے ڈھیری حسن آباد سے ہے اور وہ آفیسرز ٹریننگ اسکول منگلا کے 17ویں کورس سے فارغ التحصیل ہیں۔
سیاسی مخالفت اور تقدیر کا فیصلہ
سابق وزیراعظم عمران خان کی حکومت نے انہیں ڈی جی آئی ایس آئی کے عہدے سے ہٹا دیا تھا، اور وہ ان کی آرمی چیف بننے کے بھی مخالف تھے۔ مگر تقدیر کا فیصلہ کچھ اور تھا۔ اللہ تعالیٰ نے انہیں عزت بخشی اور وہ آج پاکستان کے سب سے بلند فوجی عہدے پر فائز ہیں۔ ان سے پہلے صرف جنرل محمد ایوب خان کو فیلڈ مارشل کا رتبہ دیا گیا تھا۔
ترکیہ و پاکستان: برادرانہ تعلقات میں نئی جہت
جنرل عاصم منیر کی قیادت میں پاکستان اور ترکیہ کے دفاعی تعلقات میں تیزی سے وسعت آئی ہے۔ دونوں ممالک مشترکہ دفاع، انٹیلیجنس تعاون اور اسٹریٹجک اتحاد کے میدان میں مل کر کام کر رہے ہیں۔ ترکیہ اردو کے قارئین کے لیے یہ خبر خوش آئند ہے کہ پاکستان میں ایک ایسا سپہ سالار موجود ہے جو روحانیت، حب الوطنی اور عسکری حکمتِ عملی کا حسین امتزاج رکھتا ہے۔
قیادت کا نیا معیار
جنرل سید عاصم منیر کی ترقی صرف ایک فرد کا اعزاز نہیں، بلکہ یہ اُس وژن کا اعتراف ہے جس نے پاکستان کو اندرونی اور بیرونی چیلنجز کے باوجود پرامن رکھا۔ ایک حافظِ قرآن، ایک جنگی ماہر، ایک سادہ مزاج راہنما — فیلڈ مارشل عاصم منیر پاکستان کی عسکری تاریخ میں ایک روشن باب کا آغاز ہیں۔
