ڈھاکہ، بنگلہ دیش میں وفاقی وزیر نے قائدِ حزبِ اختلاف ڈاکٹر شفیقُ الرّحمٰن (امیر، بنگلہ دیش جماعتِ اسلامی) سے نہایت خوشگوار اور بامعنی ملاقات کی، جس میں دونوں رہنماؤں نے باہمی احترام، علاقائی ہم آہنگی اور سماجی و معاشی تعاون کو مزید فروغ دینے کے عزم کا اعادہ کیا۔ ملاقات کے دوران پاکستان کے وزیر نے ڈاکٹر شفیق الرحمٰن کو شہباز شریف کی نیک تمناؤں کے ساتھ دورۂ پاکستان کی دعوت بھی پیش کی۔
وفاقی وزیر نے اس ملاقات میں اپنے طالبعلمی کے دنوں کی یادیں بھی تازہ کیں، جب وہ یونیورسٹی آف انجینئرنگ اینڈ ٹیکنالوجی لاہور میں اسلامی جمعیت طلبہ سے وابستہ تھے اور طلبہ سیاست میں سرگرم تھے۔ انہوں نے کہا کہ وہ دور سیکھنے، مکالمے اور خدمتِ عامہ کے شعور کی تشکیل کا وقت تھا۔
وفاقی وزیر نے بنگلہ دیش کے عوام کی محبت اور گرمجوشی کو قابلِ قدر قرار دیتے ہوئے کہا کہ عوامی روابط اور باہمی تعاون دونوں ملکوں کے مشترکہ مستقبل کو مزید مضبوط بنائیں گے اور خطے میں امن و ترقی کے فروغ میں مددگار ثابت ہوں گے۔
