انقرہ:
ترکیہ کے صدر رجب طیب ایردوان نے ایک بار پھر عالمی تنازعات کے حل میں ترکیہ کے کلیدی کردار پر زور دیتے ہوئے کہا ہے کہ ’’جس میز پر ترکیہ موجود نہیں، وہاں سے کوئی حل نہیں نکل سکتا‘‘۔
صدر ایردوان نے یہ بات انقرہ میں میڈیا سے گفتگو کے دوران کہی۔ انہوں نے کہا کہ ترکیہ نہ صرف خطے بلکہ عالمی امن کے لیے ایک اہم اور مؤثر طاقت بن چکا ہے، اور کوئی بھی فیصلہ یا معاہدہ ترکیہ کو شامل کیے بغیر پائیدار نہیں ہو سکتا۔
انہوں نے کہا کہ ترکیہ نے شام، آذربائیجان، لیبیا اور مشرقِ وسطیٰ کے بحرانوں میں ہمیشہ تعمیری کردار ادا کیا ہے۔ ترکیہ کا مؤقف ہے کہ علاقائی امن اور استحکام صرف بات چیت، باہمی احترام اور انصاف پر مبنی پالیسیوں سے ہی ممکن ہے۔
صدر ایردوان نے مزید کہا کہ ترکیہ عالمی طاقتوں کے دباؤ کے باوجود اپنے قومی مفادات پر سمجھوتہ نہیں کرے گا اور سفارتی و عسکری سطح پر اپنے کردار کو مزید مستحکم بنائے گا۔
انہوں نے واضح کیا کہ ترکیہ اپنی سرحدوں سے باہر بھی مظلوم اقوام کی حمایت جاری رکھے گا کیونکہ انصاف کے بغیر امن ممکن نہیں۔
