پاکستان کے وفاقی وزیرہوابازی غلام سرور خان نے قومی اسمبلی میں یقین دہانی کرائی ہے کہ بیس جولائی تک بیرون ممالک میں پھنسے تمام پاکستانیوں کو باعزت طریقے سے واپس لے آئیں گے۔
قومی اسمبلی میں نقطہ اعتراض پر وزیرہوابازی نے بتایا کہ این سی او سی سےدرخواست کی ہےکہ کورونا وبا میں کمی کے بعد یورپ، یوکے، چین اور دیگر ممالک کی فلائٹس چالیس فیصد سے بڑھا کر 67 فیصد تک کرنے کی اجازت دی جائے۔ اب تک پی آئی اے کی 290 فلائٹس سے 54 ہزار 116 پاکستانیوں کو ملک لایا گیا ہے۔
ترکی ایئرلائنز اور قطر ایئرلائنز سمیت مختلف غیرملکی ایئرلائنز نے بکنگ کے بعد اچانک پروازیں منسوخ کردی تھیں جس سے ہزاروں اوورسیز پاکستانی پھنس گئے ہیں ۔ پاکستان سول ایوی ایشن اتھارٹی ترکش اور قطر ایئرلائنز کو شوکاز نوٹس بھی دے چکی ہے ۔
