ترکیہ اور سعودی عرب نے ریلوے اور لاجسٹکس کے شعبوں میں تعاون کو مزید وسعت دینے کے لیے دو اہم مفاہمتی یادداشتوں پر دستخط کیے ہیں جس کا مقصد خطے میں تجارتی روابط اور ٹرانسپورٹ نیٹ ورک کو مضبوط بنانا ہے۔
یہ معاہدے سعودی دارالحکومت ریاض میں اس ملاقات کے دوران طے پائے جو ترکیہ کے وزیر ٹرانسپورٹ و انفراسٹرکچر عبدالقادر اورال اوغلو اور سعودی عرب کے وزیرِ ٹرانسپورٹ و لاجسٹک سروسز صالح بن ناصر الجاسر کے درمیان ہوئی۔
ترکیہ کی وزارتِ ٹرانسپورٹ کے مطابق پہلا معاہدہ لاجسٹکس سروسز کے شعبے سے متعلق ہے، جس میں جدید لاجسٹک مراکز کی تعمیر، آپریشن اور انتظام میں تعاون شامل ہوگا۔
دوسرا معاہدہ ریلوے کے تمام پہلوؤں میں تعاون کو فروغ دینے پر مرکوز ہے، جس میں انفراسٹرکچر کی بہتری اور ٹیکنالوجی کے تبادلے جیسے امور شامل ہیں۔
ترکیہ کے وزیرِ ٹرانسپورٹ عبدالقادر اورال اوغلو نے کہا کہ موجودہ علاقائی کشیدگی کے دوران بلا تعطل تجارت اور لاجسٹکس کا تسلسل انتہائی ضروری ہے۔
انہوں نے کہا کہ خطہ اس وقت ایک حساس دور سے گزر رہا ہے، ایسے میں تجارتی اور لاجسٹکس چینز کا بغیر رکاوٹ جاری رہنا ایک اسٹریٹجک ضرورت بن چکا ہے۔
انہوں نے بتایا کہ 2012 سے قبل دونوں ممالک کے درمیان سالانہ روڈ فریٹ ٹرانسپورٹ تقریباً 20 ہزار ٹرپس تک پہنچ گئی تھی، تاہم بعد میں علاقائی حالات کے باعث اس میں کمی آئی۔
وزیر کے مطابق ہدف یہ ہے کہ اس تعاون کو نہ صرف بحال کیا جائے بلکہ اسے سابقہ سطح سے بھی آگے لے جایا جائے۔
انہوں نے کہا کہ ترکیہ شام، اردن اور عراق سے گزرنے والے ٹرانزٹ راستوں پر نظر رکھے ہوئے ہے، جبکہ عراق کے راستے ترکیہ سے سعودی عرب تک دو آزمائشی فریٹ آپریشنز اس روٹ کی عملی صلاحیت کو ثابت کر چکے ہیں۔
انہوں نے مزید کہا کہ دوطرفہ اور ٹرانزٹ ٹرانسپورٹ کو وسعت دینا انتہائی اہم ہے کیونکہ یہ راستے یورپ اور خلیجی منڈیوں تک رسائی فراہم کرتے ہیں۔
ریلوے کے حوالے سے انہوں نے کہا کہ ترکیہ اور سعودی عرب کے درمیان براہِ راست ریلوے رابطہ اسٹریٹجک اہمیت رکھتا ہے، جبکہ ہائی اسپیڈ ریل اور ریلوے آلات میں تعاون کے امکانات بھی موجود ہیں۔
.یہ معاہدے خطے میں تجارت، لاجسٹکس اور ٹرانسپورٹ کے شعبے میں نئے مواقع پیدا کرنے اور اقتصادی روابط کو مزید مضبوط بنانے میں اہم کردار ادا کریں گے
