امریکہ میں ایک حالیہ سروے سے ظاہر ہوا ہے کہ نوجوانوں کے نقطۂ نظر میں اسرائیل کے حوالے سے اہم تبدیلی آئی ہے۔ 2023 میں کیے گئے ایک سروے کے مطابق 35 سال سے کم عمر شرکاء میں سے 37 فیصد نے اسرائیل کے بارے میں "منفی” خیالات کا اظہار کیا تھا، جو حالیہ سروے میں بڑھ کر 63 فیصد ہو گیا ہے۔
این بی سی نیوز نے 27 فروری سے 3 مارچ کے دوران امریکہ میں 1000 رجسٹرڈ ووٹرز کے ساتھ یہ سروے کیا۔ نتائج سے پتہ چلا کہ امریکی ووٹرز کے فلسطین اور اسرائیل کے بارے میں خیالات میں حالیہ برسوں میں نمایاں تبدیلی آئی ہے۔
سروے کے مطابق 2013 میں صرف 13 فیصد شرکاء نے فلسطین کے حق میں ہمدردی ظاہر کی تھی، جبکہ حالیہ سروے میں یہ تعداد 39 فیصد تک پہنچ گئی ہے۔ یہ رجحان خاص طور پر نوجوانوں اور ڈیموکریٹ پارٹی کے ووٹرز میں نمایاں ہے۔
مزید براں، اسرائیل کے خلاف فلسطین کے حق میں ہمدردی ظاہر کرنے والے ڈیموکریٹس کی شرح 2013 میں 18 فیصد تھی، جو اب بڑھ کر 67 فیصد ہو گئی ہے۔ یہ اعداد و شمار امریکی نوجوانوں میں اسرائیل کے حوالے سے بڑھتی ہوئی ناپسندیدگی اور فلسطین کے لیے ہمدردی کو واضح طور پر ظاہر کرتے ہیں۔
