جنوبی ترکیہ کے انتالیا ضلع میں اتوار کے روز ایک مسافر بس کھائی میں جا گری، جس کے نتیجے میں 9 افراد ہلاک اور 26 زخمی ہو گئے۔ بس تیکرداغ سے انتالیا جا رہی تھی اور بوزلو کمپنی کی ملکیت تھی، جس کا رجسٹریشن نمبر 26 ABG 022 ہے۔
انتالیا کے ڈوشیمالتی علاقے میں کومرلر جنکشن پر بس نے سڑک کے کنارے موجود رکاوٹوں سے ٹکرائی اور صبح تقریباً 10:20 بجے کھائی میں جا گری۔ حادثے کی اطلاع کے بعد صحت، فائر بریگیڈ، ڈیزاسٹر اینڈ ایمرجنسی مینجمنٹ پریذیڈنسی (AFAD)، جیندرمری اور پولیس کی ٹیمیں جائے حادثہ پر پہنچ گئیں اور بچاؤ، امداد اور متاثرین کو ہسپتال منتقل کرنے کے کام شروع کیے۔
انتالیا کے گورنر ہلوسی شاہن نے حادثے کے مقام کا دورہ کیا اور صحافیوں کو بتایا کہ بس گزشتہ شب تیکرداغ سے روانہ ہوئی تھی اور ڈوشیمالتی میں مڑتے وقت قابو کھو بیٹھی۔ گورنر نے کہا:
"بدقسمتی سے حادثے میں ہمارے 8 شہری جاں بحق ہو گئے اور 26 زخمی ہوئے ہیں۔ کچھ زخمیوں کی حالت نازک ہے۔ انہیں فوری طور پر قریبی ہسپتالوں، بالخصوص سٹی ہسپتال میں منتقل کیا گیا ہے۔”
ابتدائی تحقیقات سے معلوم ہوا کہ حادثے کے وقت سڑک پر گیلاپن اور دھند کی صورتحال تھی، اور بس کی رفتار سڑک کے حالات کے مطابق نہیں تھی۔ بعد میں گورنر نے انتالیا ٹریننگ اینڈ ریسرچ ہسپتال میں زخمیوں کی حالت کے حوالے سے بتایا کہ بس ڈرائیور ازیت کراغاچ بھی موقع پر ہلاک ہو گئے، جس کے بعد ہلاکتوں کی تعداد 9 ہو گئی۔
انہوں نے مزید کہا کہ زخمیوں میں سے سات افراد کی حالت نازک ہے، جن میں سے چار سٹی ہسپتال اور تین ٹریننگ اینڈ ریسرچ ہسپتال میں زیر علاج ہیں۔ دو زخمیوں کے اعضا کٹ چکے ہیں اور انہیں یونیورسٹی ہسپتال منتقل کیا جا رہا ہے جہاں اکڈینیز یونیورسٹی کے ماہرین انہیں دوبارہ جوڑنے کے لیے تیار ہیں۔
ادھر جنوبی مغربی ترکیہ کے بر دور میں انتالیا-اسپارتا ہائی وے کے قریب کازاک ٹنل کے مقام پر دو گاڑیوں کے تصادم کے نتیجے میں 7 افراد ہلاک اور 5 زخمی ہو گئے۔ حادثے میں شامل گاڑیوں کے رجسٹریشن نمبر 07 BNE 490 اور 34 FF 2118 ہیں، جبکہ ڈرائیورز کی شناخت ابھی نہیں ہو سکی۔
ہنگامی امدادی ٹیمیں جائے حادثہ پر فوری پہنچیں اور زخمیوں کو قریبی طبی مراکز منتقل کیا گیا۔ حکام تصادم کے اسباب کی تحقیقات کر رہے ہیں تاکہ اس اہم ٹرانسپورٹ روٹ پر سیکیورٹی یقینی بنائی جا سکے۔
