(مانیٹرنگ ڈیسک) بنگلہ دیش میں پاکستان کے نئے تعینات ہائی کمشنر عمران حیدر نے بنگلہ دیش کے چیف ایگزیکٹو اور چیف ایڈوائزر پروفیسر محمد یونس سے تعارفی ملاقات کی، جس میں پاک–بنگلہ دیش تعلقات کو مضبوط بنانے اور باہمی تعاون کے فروغ پر تفصیلی تبادلۂ خیال کیا گیا۔
ملاقات کے آغاز میں چیف ایگزیکٹو پروفیسر محمد یونس نے پاکستانی ہائی کمشنر کا خیرمقدم کیا اور ان کی بنگلہ دیش میں سفارتی ذمہ داریوں کے آغاز پر نیک تمناؤں کا اظہار کیا۔
اس موقع پر ہائی کمشنر عمران حیدر نے کہا کہ پاکستان اور بنگلہ دیش کے تعلقات مشترکہ تاریخ، مشترکہ عقیدے اور عوامی و خاندانی روابط پر قائم ہیں، اور دونوں ممالک کے درمیان حالیہ عرصے میں دوطرفہ روابط میں مثبت پیش رفت دیکھنے میں آئی ہے۔
ہائی کمشنر نے بتایا کہ پاکستان اور بنگلہ دیش کے درمیان ادارہ جاتی تعاون کی بحالی عمل میں آ چکی ہے، جس میں فارن سیکریٹری سطح کے مشاورتی اجلاس، مشترکہ اقتصادی کمیشن اور دیگر اعلیٰ سطحی روابط شامل ہیں، جو دوطرفہ تعلقات کو مزید مستحکم بنانے میں معاون ثابت ہو رہے ہیں۔
ملاقات کے دوران تعلیم، تجارت، اشیائے ضروریہ، میڈیکل ٹورازم، ثقافتی تبادلوں، عوامی روابط اور کاروباری تعاون سمیت مختلف شعبوں میں تعاون بڑھانے کے امکانات پر بھی تفصیلی گفتگو کی گئی۔
چیف ایگزیکٹو پروفیسر محمد یونس نے دوطرفہ تعلقات میں جاری مثبت رجحان پر اطمینان کا اظہار کرتے ہوئے کہا کہ عوامی روابط اور کاروباری شراکت داری، بالخصوص مشترکہ منصوبوں اور سرمایہ کاری کے ذریعے، مستقبل میں پاکستان اور بنگلہ دیش کے تعلقات کو مزید وسعت دی جا سکتی ہے۔
انہوں نے اعلیٰ تعلیم اور صحت کے شعبے میں پاکستان کے تعاون کو سراہا اور امید ظاہر کی کہ براہِ راست پروازوں کی بحالی کے بعد دونوں ممالک کے درمیان عوامی، تعلیمی اور تجارتی تبادلے مزید فروغ پائیں گے۔
ملاقات کے اختتام پر چیف ایگزیکٹو نے پاکستانی ہائی کمشنر عمران حیدر کے لیے بنگلہ دیش میں کامیاب، نتیجہ خیز اور مثبت سفارتی مدت کے لیے نیک تمناؤں کا اظہار کیا
