اسلام آباد میں بائنانس کی سینئر قیادت نے پاکستان کی اعلیٰ حکومتی شخصیات سے اہم ملاقاتیں کیں، جن میں ڈیجیٹل اثاثہ جات کے ضابطہ جاتی فریم ورک اور پاکستان میں کرپٹو معیشت کے مستقبل پر تفصیلی تبادلۂ خیال کیا گیا۔ وفد کی قیادت بائنانس کے گلوبل سی ای او رچرڈ ٹینگ نے کی۔
وزیراعظم محمد شہباز شریف، چیف آف ڈیفنس فورسز اور چیف آف آرمی اسٹاف فیلڈ مارشل سید عاصم منیر نے اجلاس میں شرکت کی اور ڈیجیٹل اثاثوں کے محفوظ، شفاف اور قابلِ اعتماد ریگولیشن کے لیے حکومت پاکستان کے مضبوط عزم کا اظہار کیا۔
اجلاس میں چیئرمین پاکستان ورچوول ایسٹ ریگولیٹری اتھارٹی (PVARA) بلال بن ثاقب بھی موجود تھے، جنہوں نے اپنے ادارے کی جاری پیش رفت اور پاکستان میں مجوزہ ضابطہ جاتی ڈھانچے کے اہم نکات پر بریفنگ دی۔
پاکستان اور بائنانس کے درمیان یہ مشاورت پاکستان میں فِن ٹیک شعبے کی ترقی، ڈیجیٹل فنانس کے فروغ اور جدید معاشی حکمتِ عملیوں کی تشکیل میں ایک اہم سنگِ میل قرار دی جا رہی ہے۔
