ترک جمہوریہ شمالی قبرص (TRNC) کے قیام کی 42ویں سالگرہ کے موقع پر اسلام آباد میں ایک پروقار تقریب کا انعقاد کیا گیا، جس کی میزبانی TRNC کی سفیر بوکت کوپ نے کی۔ اس تقریب میں پاکستان سمیت برادر اور دوست ممالک کے متعدد سفارتی نمائندوں نے شرکت کی، جس سے تقریب ایک بین الاقوامی سفارتی اجتماع کا رنگ اختیار کر گئی۔
تقریب میں ترکیہ کے سفیر ڈاکٹر عرفان نذیروغلو، آذربائیجان، ازبکستان، قازقستان، فلپائن اور سوڈان کے سفارت کار موجود تھے۔ پاکستان کی نمائندگی سابق سیکرٹری خارجہ سہیل محمود نے کی، جبکہ ممتاز شخصیات سیلم سیف اللہ خان، ستارہ ایاز، سحر کامران، ڈاکٹر رمیش کمار اور نعیم اقبال چیمہ نے بھی خصوصی طور پر شرکت کی۔
اپنے خطاب میں سفیر بوکت کوپ نے TRNC–پاکستان تعلقات کی تاریخی بنیادوں اور روشن مستقبل پر روشنی ڈالی۔ انہوں نے کہا کہ TRNC پاکستان کو ایک سچے برادر ملک کے طور پر دیکھتا ہے اور دونوں ممالک کے عوام کے درمیان تعلقات وقت کے ساتھ مزید مضبوط ہو رہے ہیں۔ شرکائے تقریب نے TRNC کی ترقی، سفارتی کامیابیوں اور دونوں ممالک کے بڑھتے ہوئے تعاون کے لیے نیک خواہشات کا اظہار کیا۔
ترک صدر رجب طیب ایردوان نے بھی TRNC کی 42ویں سالگرہ پر خصوصی مبارکباد کا پیغام دیا۔ انہوں نے یقین دہانی کرائی کہ ترکیہ، TRNC کی سیاسی، معاشی اور سفارتی استحکام کے لیے ہمیشہ مکمل حمایت جاری رکھے گا۔ ان کا کہنا تھا کہ TRNC کی ترقی، امن اور خودمختاری کے سفر میں ترکیہ مضبوطی سے اس کے ساتھ کھڑا ہے اور عالمی سطح پر اس کی جائز آواز کو بھرپور انداز میں اجاگر کرتا رہے گا۔
تقریب میں شریک مہمانوں نے بھی TRNC کے لیے پاکستان کی اصولی اور ثابت قدم حمایت پر اپنے خلوصِ تشکر کا اظہار کیا، جبکہ پاکستان–TRNC تعلقات کو مستقبل میں مزید وسعت دینے کے عزم کا اعادہ کیا گیا۔
