وزیراعظم پاکستان میاں شہباز شریف کی خصوصی ہدایات پر 28 تا 30 اکتوبر 2025ء کو ملک بھر میں پاکستان–ترکیہ دوستی کا ہفتہ منایا گیا۔
اس موقع پر مختلف سرکاری و نجی اداروں، تعلیمی تنظیموں اور ثقافتی مراکز میں خصوصی تقریبات، نمائشیں، سیمینارز اور ’’دوستی واکس‘‘ کا اہتمام کیا گیا، جن میں دونوں ممالک کے عوام کے درمیان تاریخی، ثقافتی اور جذباتی رشتے کو خراجِ تحسین پیش کیا گیا۔
اسلام آباد، لاہور، کراچی سمیت ملک کے بڑے شہروں میں منعقد ہونے والی سرگرمیوں میں شرکاء نے پاکستان اور ترکیہ کے درمیان تعلقات کو مزید مضبوط بنانے کے عزم کا اظہار کیا۔
وزیراعظم شہباز شریف نے اپنے پیغام میں کہا کہ:
“پاکستان اور ترکیہ کی دوستی باہمی اعتماد، احترام اور بھائی چارے کی ایک مثالی علامت ہے، جو وقت کے ساتھ مزید مضبوط ہو رہی ہے۔”
ترکیہ کے سفارتخانے اور قونصل خانوں نے بھی اس موقع پر تمام شراکت دار اداروں، تنظیموں اور شہریوں کا شکریہ ادا کیا جنہوں نے دوستی کے اس ہفتے کو کامیاب بنانے میں اپنا کردار ادا کیا۔
یہ تقاریب دونوں ممالک کے درمیان یکجہتی، تعاون اور مشترکہ مستقبل کے عزم کی عکاسی کرتی ہیں۔
