لاہور: گورنمنٹ کالج یونیورسٹی (جی سی یو) لاہور کے تعاون سے یومِ دفاعِ پاکستان اور عجائباتِ ترکیہ کے عنوان سے ایک خصوصی تصویری نمائش کا انعقاد کیا گیا۔ اس نمائش کا مقصد پاکستان کی عسکری قربانیوں اور ترکیہ کی ثقافتی و تاریخی خوبصورتیوں کو ایک ہی پلیٹ فارم پر اجاگر کرنا ہے۔
نمائش کی افتتاحی تقریب میں قونصل جنرل جمہوریہ ترکیہ لاہور، مہمت ایمین شِمشیک نے بطور مہمانِ خصوصی شرکت کی۔ تقریب میں اساتذہ، طلبہ، سفارتی شخصیات اور مختلف شعبہ ہائے زندگی سے تعلق رکھنے والے افراد کی بڑی تعداد موجود تھی۔
افتتاحی تقریب سے خطاب کرتے ہوئے قونصل جنرل نے کہا کہ پاکستان اور ترکیہ کے تعلقات اخوت، محبت اور اعتماد کی بنیاد پر استوار ہیں، اور یہ نمائش دونوں ممالک کے عوامی رشتوں کو مزید مضبوط بنانے کا ذریعہ ہے۔ انہوں نے کہا کہ یومِ دفاع پاکستان ہمیں قربانی اور بہادری کی یاد دلاتا ہے، جبکہ ترکیہ کی تاریخی اور ثقافتی جھلکیاں اس خطے کی عظیم وراثت کو ظاہر کرتی ہیں۔
جی سی یو لاہور کے منتظمین نے اس موقع پر کہا کہ اس طرح کی تقریبات نوجوان نسل کو نہ صرف اپنی تاریخ سے روشناس کراتی ہیں بلکہ انہیں عالمی ثقافتوں اور روایات کو قریب سے دیکھنے کا موقع بھی فراہم کرتی ہیں۔
شرکاء نے تصویری نمائش کو بھرپور سراہتے ہوئے کہا کہ اس سے پاکستان اور ترکیہ کے تعلقات کو نئی جہت ملے گی اور عوامی سطح پر مزید ہم آہنگی بڑھے گی۔
