انقرہ —ترک وزیر خارجہ حاقان فیدان نے عالمی برادری کو دوٹوک پیغام دیتے ہوئے کہا ہے کہ دنیا میں کوئی ایسی طاقت موجود نہیں جو ترکیہ کو دھمکا سکے یا اس کے ترقی و استحکام کے سفر کو روک سکے۔ ان کا کہنا تھا کہ ترکیہ اپنی خودمختاری، قومی سلامتی اور عوامی مفاد پر کسی قسم کا سمجھوتہ نہیں کرے گا۔انہوں نے کہا کہ ترکیہ آج خطے اور دنیا میں ایک مضبوط اور مؤثر طاقت کے طور پر ابھر رہا ہے، جو اپنے فیصلے آزادانہ طور پر کرتا ہے اور کسی بیرونی دباؤ کے سامنے جھکنے کا تصور بھی نہیں رکھتا۔ حاقان فیدان نے زور دیا کہ ترکیہ اپنے مفادات کے تحفظ اور ترقی کی راہ میں آنے والی ہر رکاوٹ کو عبور کرے گا اور دشمن قوتوں کے عزائم کو ناکام بنائے گا۔ترک وزیر خارجہ نے مزید کہا کہ ترکیہ اپنے عوام کے روشن مستقبل کے لیے ہر شعبے میں جرات مندانہ اقدامات جاری رکھے گا اور یہ سفر کسی دھمکی یا سازش سے نہیں رکے گا۔
