لندن / برلن —یورپ میں فلسطین کی ریاستی حیثیت کو تسلیم کرنے کی لہر میں تیزی آتی جا رہی ہے، اور اب پرتگال اور جرمنی بھی باضابطہ طور پر فلسطین کو تسلیم کرنے کے قریب پہنچ گئے ہیں۔سفارتی ذرائع کے مطابق پرتگال کی حکومت نے اندرونی سطح پر اس فیصلے پر اتفاق رائے پیدا کر لیا ہے، اور جلد ہی پارلیمان میں اس حوالے سے باقاعدہ قرارداد پیش کی جائے گی۔ اسی طرح جرمن حکام بھی فلسطین کو تسلیم کرنے کے لیے سیاسی مشاورت کے آخری مراحل میں ہیں۔یہ پیش رفت اس وقت ہو رہی ہے جب ناروے، آئرلینڈ اور اسپین پہلے ہی فلسطین کو ایک آزاد ریاست کے طور پر تسلیم کر چکے ہیں، اور یورپی یونین کے کئی دیگر ممالک بھی اسی سمت میں سوچ رہے ہیں۔یورپی ممالک کی اس بڑھتی ہوئی حمایت کو اسرائیل کی فلسطینی علاقوں میں جاری جارحیت، انسانی حقوق کی سنگین خلاف ورزیوں اور غزہ میں بگڑتی ہوئی انسانی صورتحال کے تناظر میں اہم پیش رفت قرار دیا جا رہا ہے۔بین الاقوامی ماہرین کے مطابق اگر جرمنی جیسا کلیدی یورپی ملک فلسطین کو تسلیم کر لیتا ہے، تو یہ نہ صرف یورپی یونین کی پالیسیوں میں بڑی تبدیلی ہو گی بلکہ فلسطین کے عالمی سطح پر ریاستی درجہ حاصل کرنے کی راہ ہموار کر سکتی ہے۔دوسری جانب اسرائیل نے اس پیش رفت پر شدید ردعمل کا اظہار کرتے ہوئے کہا ہے کہ یکطرفہ فیصلے امن عمل کو نقصان پہنچا سکتے ہیں۔ تاہم فلسطینی قیادت نے اسے تاریخی موقع قرار دیتے ہوئے عالمی برادری سے مطالبہ کیا ہے کہ وہ انصاف، آزادی اور دو ریاستی حل کے اصول پر عمل درآمد کو یقینی بنائے۔یہ امکانات ایسے وقت میں سامنے آ رہے ہیں جب اقوام متحدہ میں دو ریاستی حل پر عالمی کانفرنس بھی جاری ہے، جس کا مقصد فلسطین-اسرائیل تنازع کے مستقل اور منصفانہ حل کی کوششوں کو تقویت دینا ہے۔
